Foo...

Internet Explorer 9 RC

2011-02-12T12:09:00.001Z

Þetta er nú pínkupons spaugilegt. Ég setti upp Internet Explorer 9 RC (i.e. release candidate) á heimatölvunni minni og eitt það fyrsta sem vefráparinn stakk upp á þegar hann keyrði upp í fyrsta skipti var að gera óvirk nokkrar viðbætur sem væru að hægja á keyrslu hans. Helstu viðbætur sem vefráparinn leggur til að slökkt sé á til að flýta fyrir eru viðbætur sem eru frá Microsoft fyrirtækinu sjálfu. Ekki það að 0 komma eitthvað sekúndur sé eitthvað til að grenja yfir en margt smátt gerir eitt stórt.

Að blogga, twitta eða fésa?

2010-03-10T21:45:00.001Z

Að blogga, twitta eða fésa, það er spurningin. Það er orðið svo mikið um allskonar tækni fyrir tengslanet og þvíumlíkt. Síðan er hægt að tengja þessi tengslanet sem maður er á fram og til baka. T.d. að láta twitter skilaboð birtast á LinkedIn og facebook síðunni sinni og notað Google Buzz til að fylgjast með öllum herlegheitunum hjá öðrum. Maður þarf að hafa sig allan við til að fylgjast með og vera almennilega inni í tækninni. Ja…. það er nú kannski bara borin von.

Að taka ástfóstri...

2008-11-27T23:25:00.002Z

Gaman þegar maður dettur inná að fara lesa bækur eftir ákveðna höfunda sem hafa þá þegar gefið út heilan helling af bókum. Þá þarf maður ekki að bíða í heillangan tíma eftir næstu bók heldur getur bara spænt í sig næstu og næstu og næstu. T.d. er ég núna búinn að lesa/hlusta á 6 bækur í röð eftir Lois McMaster Bujold (Miles Vorkosigan sögurnar), og þaráður 12 bækur eftir Terry Pratchett í Discworld seríunni. Terry Pratchett hefur gefið út 36 sögur sem gerast í Discworld heiminum. Semsagt nóg eftir þar. Jebb.... gaman gaman.

Afi minn og amma mín útá bakka búa...

2008-11-26T01:29:00.004Z

Jebb... eitthvað er (tæplega) þriggja ára dóttir mín orðin þreytt á lítillri fjölbreytni á lagavali þegar ég er að syngja fyrir hana fyrir háttinn. Greyið fær alltaf að heyra sömu fimm lögin hjá mér áður en hún fer að sofa. En í kvöld var hún búin að fá nóg. Þegar ég söng síðasta lagið fyrir hana, nefnilega "Afi min og amma mín útá bakka búa..." þá söng hún fyrir mig sína útgáfu (líklega leikskólaútgáfu):

Afi minn og amma mín

fóru út að hjóla

afi datt í drullupoll

og þá fór amma að góla

Nokkuð smellið hjá henni finnst mér :)

Hrollvekjur og Celine Dion?

2008-11-12T21:16:00.002Z

Það er kannski sannleikskorn í þessu hjá Elko? Ég var að skoða Bluray listann þeirra yfir hrollvekjur til að sjá hvort að The Thing (ein sú allrabesta) væri komin til þeirra á háskerpunni og þar er ein af myndunum sem eru taldar upp á þeim lista "Celine Dion - A New Day, Live in Las Vegas (Blu-ray)" :) Sjá annars listann hérna

Gagnrýni á Ísland?

2008-10-20T22:16:00.001Z

Það er mikið verið að gagnrýna Ísland í heild fyrir hvernig komið er fyrir bankakerfinu okkar. En kannski ættu þessir blessuðu erlendu aðilar líka að gagnrýna þá sem lánuðu íslensku bönkunum svona (næstum því) endalaust.

Mér finnst síðan í lagi að það væru gerðar nokkrar kröfur á alþjóðasamfélagið eftir þessar hremmingar, t.d.:

1. Engar skattaparadísir, og um leið útrýma undanskotum frá skatti
2. Banna skortsölu og aðra álíka fjármálalega ógjörninga

Facebook & Nexus & ML & vinnustaðurinn

2008-10-01T10:27:00.004Z

Hmmm.... þetta facebook apparat hefur nú eiginlega alveg farið frammhjá mér. Ég sá að Nexus búðin ætlar að fara nota Facebook sem einhverskonar skilaboðaskjóðu fyrir bækur & myndir & þvíumlíkt og stofnaði því aðgang til að tékka á þessu. Þegar ég var búinn að fylla út smávegis af upplýsingum um mig þá demdist inn heljar listi yfir Facebook notendur sem ég ætti hugsanlega að kannast við - þar á meðal slatti af vinnufélögum úr bankanum og af bekkjarsystkinum frá ML, nokkuð nett atarna. Læt nú samt vera í bili að bögga allt þetta lið með svokölluðum vinarbeiðnum.

Sumarið 2008 - alveg ágætt

2008-10-01T10:12:00.004Z

Jebb, þetta er búið að vera ágætis sumar. Fórum í byrjun sumarsins með Dodda & Veru & co. í 3 vikna ferð til Danmerkur. Fyrst var stoppað í Lalandia, æðislegur fjölskyldugarður þar sem nóg var að sýsla fyrir börnin. Síðan voru teknar tvær vikur í sumarhúsi á norður Jótlandi. Algjört primo. Legoland, sædýrasafn, dýragarðar ofl. haft með í pakkanum. Semsagt gargandi snilld.

Ubuntu á iMac í boði VMWare Fusion á 15 mín.

2008-05-17T08:47:00.005Z

Ég var ekki í vinnunni í gær þar sem yngsta dóttir mín var veik. Einhver hitavella í gangi sem hún virðist vera laus við núna. En meðan hún tók síðdegislúrinn sinn í gær ákvað ég að "nördast" smávegis. Ég náði í .iso skrá fyrir nýjustu útgáfuna af Linux Ubuntu stýrikerfinu og setti hana upp á iMac tölvunni minni sem sýndarvél í VMWare Fusion. Það að ná í .iso skrána (um 700MB) tók enga stund þar sem hún var aðgengileg á hugi.is, sjálf uppsetningin í VMWare Fusion tók innan við 15 mínútur. VMWare Fusion er vægast sagt svalt apparat, með því er ekkert mál að skoða nýjar útgáfur af ýmsum Linux og Solaris dreifingum án þess að eiga neitt við uppsetninguna á tölvunni sjálfri ásamt því að þú getur einnig keyrt Windows Server/XP/Vista sem sýndarvél - semsagt engin hætta á að skemma neitt. Ég var síðan að lesa í bloggi Fusion hópsins hjá VMWare að útgáfa 2 af VMWare Fusion verði ókeypis fyir þá sem keyptu útgáfu 1 - ekki slæmt. Eða svo maður dragi þetta saman og orði þetta almennt og á klisjukenndan hátt: VMWare rokkar!!!

Hvernig fara einstæðar mæður að?

2008-05-07T22:33:00.004Z

Hmm... þetta er nú ekki alveg pólítískt rétthugsandi fyrirsögn hjá mér... Hvernig fer einstætt foreldri að? Aðeins betra... En svo ég komi mér að efninu þá fór Kristín til Danmerkur á vegum vinnunnar núna á þriðjudaginn og kemur til baka næsta laugardag, og það er sko nóg að gera að sjá einn um þessi þrjú á meðan. Maður þarf í stórum dráttum að ... hætta kl. 15:30 í vinnunni til að sækja fyrst þá yngstu til dagmömmu, síðan sækja strákinn á leikskóla, koma við í búðinni á leiðinni heim - engjast yfir því hvað eigi að vera í matinn, gefast upp og kaupa 1944 rétt, þegar heim er komið þá þarf að hlýða þeirri elstu yfir með flautuna (tónleikar hjá henni á morgunn), hafa samviskubit yfir því maður hafi smellt þeirri yngstu fyrir framan sjónvarpið, að setja í þvottavélina, hafa til matinn (guð sé lof fyrir örbylgjuofninn) og koma honum ofaní liðið, næst allir í náttföt (nema ég), bursta tennurnar í þeim tveimur yngstu - sú elsta sér um sig sjálf, lesa fyrir þá yngstu fyrir háttinn og síðan syngja bíbí & blaka og krummi krunkar úti - þá er hún búin að fá nóg og er alveg sátt við að fara sofa (bara ef hann hættir að syngja!!!), næst er að lesa fyrir strákinn fyrir háttinn og síðan fara þau tvö elstu að sofa, vaska upp (bévítans uppþvottavélin er biluð) & þurrka og ganga frá í eldhúsinu, brjóta saman það sem er orðið þurrt af snúrunum, hengja upp úr þvottavélinni og setja í næstu, ganga frá nestinu í skólann fyrir þá elstu og hafa til fötin fyrir strákinn sem er að fara í sveitaferð með leikskólanum í fyrramálið (og ég fer með). Og þá er klukkan orðin tuttugu mínútur í ellefu! Og ég sem ætlaði að ná að horfa á allt settið af Hringadróttinssögu á meðan Yfirvaldið væri í Danmörku. Það er ljóst að ég þarf að besta þetta ferli eitthvað.

PS3 og Unreal Tournament III

2008-02-23T10:55:00.003Z

Jebb - fór í gær og keypti Unreal Tournament III fyrir PS3. Fantagóður netleikur sem hefur verið að fá topp dóma. Einn kostur sem þessi leikur hefur frammyfir aðra PS3 leiki er að mod eða viðbótarborð sem notendur leiksins geta búið til gengur hvort sem er í PC eða PS3 útgáfuna. Um leið er hægt að breyta leiknum eitthvað, t.d. er komið frekar flott Lego mod fyrir leikinn - frekar fyndið apparat.

Horft aftur á Life of Brian

2008-02-03T21:55:00.000Z

Ég er safnari. Já ég veit af þessum veikleika og er að reyna lifa með honum. En í síðustu viku réð ég ekki við mig. Ég fór og keypti Blu-Ray útgáfuna af "Monty Python's Life of Brian" sem ég átti fyrir á venjulegu DVD. Yfirvaldið skilur ekkert í þessari áráttu hjá mér og hristir bara hausinn yfir þessu. Ég horfði síðan á myndina aftur í gærkvöldi og síðan einnig á heimildarmynd um gerð myndarinnar - ótrúleg læti sem urðu í kringum myndina á sínum tíma. Trúlega fengist þessi mynd ekki gerð í dag - það má ekki móðga neinn, óþolið fyrir slíku er alveg í hámarki. Life of Brian er tvímælalaust ein besta gamanmynd og ádeilumynd sem gerð hefur verið. Uppáhaldsatriðið mitt í myndinni er skóatriðið þar sem Brian flýr undan "söfnuðinum" sínum og missir af sér skóinn, söfnuðurinn staðnæmist við skóinn þar sem hann liggur á götunni og fer strax að rífast um merkingu þessa - lýsandi fyrir trúarbrögð og klofning þeirra í mismunandi stefnur/trúarhópa með tilheyrandi átökum.

Guillermo del Toro að leikstýra The Hobbit?

2008-01-28T22:33:00.001Z

Vonandi verður eitthvað úr þessu. Guillermo del Toro ku vera í viðræðum við New Line Cinema um að leikstýra Hobbitanum (sem verða líklega tvær myndir - best að blóðmjólka kúna). Best hefði að sjálfsögðu verið ef Peter Jackson hefði séð alveg um þetta eins og LOTR - en það verður því miður ekki af því vegna annarra verkefna hjá Jackson (hann var búinn að lofa sér í Tinna fyrir Steven Spielberg). En mér líst mun betur á þessar fréttir heldur en þær að Sam Raimi myndi leikstýra Hobbitanum. Sam Raimi átti snilldarspretti með Evil Dead myndunum og Spider Man 2 (ekki síst að þakka Alfred Molina). En maðurinn klúðraði málunum svo hrikalega stórt í Spider Man 3 að það hálfa hefði verið nóg.

Ferlegt að málin hafi klúðrast svona milli New Line Cinema og Peter Jackson vegna deilna um greiðslur af LOTR myndunum til Jackson. Eftir að sættir náðust með Jackson og New Line varð það að samkomulagi að hann myndi sjá um framleiðslu á Hobbitanum. Það væri frábært ef sama teymið og sá um að skrifa handritið að LOTR myndi sjá um að skrifa handritið fyrir Hobbitan, eiginlega nauðsynlegt - svo ekki sé minnst á það allra nauðsynlegasta.... nefnilega það að Ian McKellen leiki Gandálf.

Guilermo del Toro er topp leikstjóri - eiginlega einn af mínum uppáhalds leikstjórum. Af myndunum hans þá á ég á DVD eða Blu-Ray myndirnar Cronos, Mimic, The Devil's Backbone, Blade II (besta Blade myndin), Hellboy (ein besta myndin gerð eftir comic - stendur jafnfætis Sin City) og Pan's Labyrinth). Hann hefur alveg sannað að hann er jafnvígur á spennu/action og drama og gerir flottar myndir (i.e. gott listrænt auga - a.m.k. að mínu mati). Enda bíður maður spenntur eftir Hellboy II: The Golden Army sem á að koma í bíóhúsin á þessu ári.

Mikið var - DRM laus tónlist fyrir alla

2008-01-27T13:35:00.000Z

Jebb - mikið var. Amazon ætlar á þessu ári að byrja á að selja DRM fría tónlist til allra, þ.e. ekki bara USA heldur okkar hinna líka. Kominn tími á að einhver tæki af skarið í þessum efnum. Þá er bara að vona að þetta sé bara byrjunin á því að vefverslanir almennt séu ekki með skorður á kaupum á rafrænu efni eftir því hvar maður býr (eins og er ennþá í Apple iTunes, PS3 vefverslun, Rapshody, XBox 360 vefverslun, PSP vefverslun ofl.).

Sjá tilkynninguna frá Amazon um þetta hérna

Bók nr. 12 í Wheel of Time seríunni

2008-01-23T21:40:00.001Z

Þá er víst búið að ákveða hver kemur til með að ljúka við bók nr. 12 í Wheel of Time bókarflokknum eftir Robert Jordan sem dó í september á síðasta ári. Einhver Brandon Sanderson, sem ég hef aldrei heyrt um áður. Gott að þau ætla að ljúka við bókarflokkinn enda kannski leiðinlegt fyrir þá sem eru búnir að lesa allar þær 11 bækur sem eru komnar út að fá ekki eiginleg sögulok. Það er áætlað að bókin komi út vorið 2009 - manni ætti þá að vera óhætt að halda áfram að lesa bækur í þessari seríu fyrst hún verður kláruð, kannski ég fari að klára bók nr. 5.

Mogginn ræður, stjórnar og/eða toppar

2008-01-22T20:40:00.000Z

Jebb - enginn efi á því mogginn toppar aðrar innlendar fréttaveitur. Sá annars dálítið á mbl.is í gærkvöldi sem tengist þessum blessaða blogghluta á vefnum - eitthvað sem mér fannst nú að gæti farið betur og sendi þeim línu um það - og hókuspókus.... sá ekki betur en að fítusinn hafi komið á vefinn þeirra í dag. Bara ansk. gott hjá þeim. Væri nú svosem gott ef maður gæti slökkt á að sjá þessar blessuðu blogg fyrirsagnir með fréttunum - já já já.... ég er það veiklundaður að ég stelst stundum til að lesa sumar færslurnar og mikið gasalega eru sumar afspyrnu heimskulegar og pirrandi - ekki það að ég hafi neitt gábbulegra framm að færa á mínu eigin bloggi en ég er ekki að troða mínu bloggi á saklausa vegfarendur moggavefsins. Mitt blogg er eiginlega bara fyrir sjálfan mig og þá 2-3 aðila lesa þetta hjá mér af og til, annars myndi ég troða mér á bloggið á mbl.is

Hvernig á maður annars að þýða "mogginn rules"? Ræður, stjórnar, toppar?

Blue-ray vs. HD-DVD baráttunni að ljúka?

2008-01-05T00:17:00.000Z

Hmmm.... kannski að baráttunni milli Sony (Blue-ray) og Toshiba (HD-DVD) fari núna að ljúka nú þegar Warner munu eingöngu gefa út venjulega DVD og Blue-ray diska frá maí á þessu ári. Þá ku yfirgnæfandi meirihluti (um 70%) af stóru aðilunum í HD útgáfu vera komnir á Blue-ray. Sjá annars frétt um þetta hér

Íslenskir auglýsendur, leikir fyrir börn og klám - hluti III

2008-01-04T23:14:00.001Z

Sunnudaginn 15. des. 2007 kom blessaður Mogginn út með þessa frétt (sjá blogg um þetta hér), sem var þann daginn frétt nr. 1 í listanum yfir mest lesnu fréttirnar á vef mbl.is. Misgáfulegir einstaklingar blogguðu um fréttina og hreinlega "föttuðu" augsýnilega ekki um hvað málið snýst. Það er ekki eins og það sé verið að tala um saklausar myndir af fáklæddu fólki. Nei - leikjanet er vefsetur sem stílar inná að bjóða börnum uppá ókeypis netleiki - og hverskonar vefsetur haldið þið að séu á bakvið auglýsingu eins og "Watch free sexy webcam girls" sem var fest við Tomma og Jenna leik - ef það er ekki hreint og beint klámvefsetur þá er slíkt klámvefsetur í amk í eins til tveggja músarsmells fjarlægð á því vefsetri.

Auk þess var auglýsingin ekki alltaf að birtast á síðunni - það voru mismunandi auglýsingar sem rúlluðu þarna í gegn. Þannig að foreldrar sem hafa athugað leikinn og talið hann í lagi (og gefið börnunum leyfi á að spila hann) hafa nú líklega ekki átt von á því að einn daginn mundi dúkka upp tenging á klámsíðu fyrir neðan leikinn.

Smá sýnishorn af flugeldasýningunni um áramótin

2008-01-02T22:40:00.000Z

séð úr Stuðlaberginu...

Íslenskir auglýsendur, leikir fyrir börn og klám - hluti II

2007-12-15T10:27:00.000Z

Blessaður mogginn kom út með þessa frétt

Íslenskir auglýsendur, leikir fyrir börn og klám?

2007-12-14T15:45:00.000Z

Póstaði þetta á MBL.is - sjáum hverju það skilar:

Góðan daginn Morgunblaðið.

Hérna er nú kannski eitthvað sem vert er að vekja athygli á. Ef farið er inná leikjanet (www.leikjanet.is) þá eru þar ýmsir leikir sem eru ætlaðir börnum. T.d. er einn Tommi og Jenny leikur hérna: http://www.leikjanet.is/?gluggi=leikir_spila&leikur=1248 - svona dæmigerður hopp-og-skopp leikur fyrir krakka. Efst á skjánum rúlla í gegn auglýsingar frá fyrirtækjum eins og Kaupþingi og EJS en neðst er boðið upp á "Watch Free Sexy Webcam girls" með tilheyrandi hlekki. Nú er mér spurn hvort að foreldrar taki eftir því að sumar af þessum auglýsingum sem rúlla þarna í gegn eru ekki beint ætlaðar börnum, og einnig hvort að þessi íslensku fyrirtæki sem þarna auglýsa geri sér grein fyrir í hverskonar samfloti þau eru. Hvort að foreldrar geri sér grein fyrir að frá leikjaneti eru bara örfáir músarsmellir í klámsíður.

Með kveðju,
Arnar Freyr Guðmundsson

Bókarflokkar sem taka endi

2007-12-12T18:32:00.001Z

Ég skrifaði hér áður um bókaflokka sem engan enda ætla að taka þar sem höfundarnir hafa tekið upp á því að deyja áður en þeir náðu að klára síðustu bókina/bækurnar í seríunni. En það eru svo sem nokkrar góðar seríur sem er óhætt að byrja á (og ég mæli með). Stephen King náði að klára Dark Towers seríuna eftir að hafa verið að bögglast með sögurnar og tengja við aðrar bækur sínar eiginlega allan sinn rithöfundarferil - hann á það líka til blessaður að teygja lopann ansi mikið í sumum bókunum sínum. Sonur Frank Herberts, Brian Herbert hefur ásamt Kevin J. Anderson lokið við Dune bókarflokkinn (ég á sjálfur eftir að lesa tvær síðustu sem sonurinn gaf út), auk þess sem þeir félagarnir skrifuðu 6 bækur sem gerast á undan upprunalegu Dune bókunum. Þannig það er nokkuð óhætt að lesa allan Dune sagnabálkinn. Þríleikur Richard Morgan um Kovacs, bækurnar "Altered Carbon", "Broken Angels" og "Woken Furies", eru með betri SciFi bókum sem ég hef lesið - hver um sig með sjálfstæðum söguþræði - aðalpersónan og sá heimur sem hún lifir í tengir bækurnar saman. Sérstaklega var sú fyrsta, "Altered Carbon", góð. Aðrar seríur sem ég mæli með eru t.d. Earthsea bækurnar eftir Ursula Le Guin, Forever bækurnar (lauslega tengdar saman) eftir Joe Haldeman - af þeim unnu Forever War og Forever Peace báðar Hugo og Nebula verðlaunin - ekkert slor það, og síðan eru Riverworld bækurnar eftir Philip José Farmer einnig góðar.

Ólesið...

2007-12-05T00:26:00.000Z

Enn meira um bækur... Í bjartsýniskasti fyrir nokkrum árum keypti ég þrjá doðranta eftir Peter Hamilton, "The Reality Dysfunction", "The Neutronium Alchemist" og "The Naked God", yfir 1200 bls. hver bók. Þær hafa bara verið uppá punt uppí hillu hjá mér hingað til. Ku víst vera fantagóðar SciFi óperur en ég semsagt hef ekki náð að byrja á þeim - svitna eiginlega bara á því að sjá þær í hillunni. Ég á eiginlega orðið ískyggilega mikið af ólesnum bókum - er ennþá á blessuðum bókarkaupshraðanum sem ég var á þegar ég var á menntaskólaaldri en hef ekki aðlagað hann að breyttum frítíma (þ.e.a.s. skorti á frítíma).

Alltaf gaman að fikta með nýjar græjur

2007-12-02T22:24:00.000Z

Jebb - Núna er ég að leika mér með nýja leikfangið. Nefnilega Apple iMac 24" Core 2 2.8GHz Extreme. Ýmiss forrit sem fylgja með sem gaman er að fikta í.

X - loksins

2007-12-01T17:39:00.000Z

Jebb - loksins, loksins... Er búinn að svíkja lit. Renndi við í Apple búðinni áðan og labbaði út með iMac "24.

Meira af myndasögum

2007-11-30T00:19:00.000Z

Ég skrifaði/bloggaði á miðvikudaginn um myndasöguna Sandman eftir Neil Gaiman en það eru nokkrir aðrir höfundar sem ég hef verið að lesa myndasögur eftir - og held uppá. Til dæmis er ég mjög hrifinn af sögum eftir Alan Moore (From Hell, V for Vendetta, Watchmen, Smax, The League of Extr. Gentlemen, Top 10, Tom Strong ofl.), Bill Willingham (Fables), Frank Miller (Sin City, RoboCop, Ronin, Year One, The Dark Knight Returns og The Dark Knight Strikes Again) og Mike Mignola (Hellboy og B.P.R.D). En hvað húmor í myndasögum varðar þá kemst enginn með tærnar þar sem Gary Larson hefur hælana - The Far Side toppar þar allt sem hægt er að toppa. Alveg hreinar línur.

Bókarlestur... Í vinnslu...

2007-11-29T00:41:00.000Z

Áfram um bækur... Ég er núna að lesa þriðju og síðustu bókinni, "The Last Colony", í þríleik John Scalzi sem hófst í "Old Man's War", og hélt áfram í gegnum aukapersónu úr fyrstu bókinni í "The Ghost Brigades" - tvær fyrstu bækurnar eru fantagóðar og byrjunin á númer þrjú lofar góðu.

Bjólfur, Neil Gaiman

2007-11-28T01:25:00.001Z

Var rétt í þessu að koma af þrívíddar (3D) sýningu á Beowulf. Fantagóð, sérstaklega flott 3D atriðin í lokin. Myndin var eiginlega mun betri en ég átti von á - sem er nú alltaf skemmtilegra. Þrívíddartæknin var alveg að virka og það verður gaman að sjá hvernig James Cameron tekst til við þrívíddarmyndina sína sem skv. IMDB er ekki Avatar eins og ég hélt heldur Battle Angel (byggð á japanskri teiknimyndasögu). En aftur að Beowulf - handritið er skrifað af Neil Gaiman og Roger Avary, en Neil Gaiman þessi er nokkuð skemmtilegur fír - hann heldur úti skemmtilegu bloggi sem ég hef verið að fylgjast með í nokkurn tíma (gegnum RSS) á http://www.neilgaiman.com/ - fylgdist sérstaklega vel með því þegar hann heimsótti Guillermo del Toro í Ungverjalandi þar sem sá síðarnefndi er að taka upp Hellboy 2 - þá var reyndar dóttir Gaimans sérstakur gestabloggari á meðan heimsókninni stóð (og allt í fínu með það). Núna er einnig verið að sýna aðra mynd sem byggir á sögu (bók) eftir Gaiman, nefnilega Stardust - sem ég sá um daginn og fannst nú bara nokkuð góð, svona létt fantasíu mynd. Ég hef nú annars ekki lesið neina skáldsögu eftir Gaiman (á Stardust uppí hilli - að sjálfsögðu) en á nokkrar myndasögur eftir kappann. Hans aðalverk er Sandman sem komu út á árunum 1989 og 1996, og er verið að gefa út um þessar mundir í heild sinni í fjórum stórum veglegum bókum (omnibus) - sem ég á tvær fyrstu af. Sandman er tær snilld - með því besta sem ég hef lesið í myndasögum, vonandi að restin sé eins góð (eða betri) og byrjunin.

Laxveiði síðastliðins sumars - frá Svarthöfða

2007-11-27T20:58:00.001Z

Sumarið sem er liðið var bara prýðilegt laxveiðisumar fyrir mig. Komst aftur á þann eðalstað Svarthöfða í Borgarfirði og síðan í Kjarrá seint í ágúst. Það mátti ekki miklu muna að ég kæmi með devon/krókinn/fluguna í rassinum heim úr Svarthöfða. Við vorum þarna á ferðinni snemma sumars (þegar veiðileysið vegna vatnsleysis var að drepa menn um allt land) og vorum í tvo daga. Doddi fékk tvo laxa (sitthvorn daginn að mig minnir) en að kveldi seinni veiðidagsins var útlitið heldur svart fyrir mig - ekki búinn að fá neinn. Eftir kvöldmat þá skiptum ég og Doddi um veiðistað, ég fer á efsta svæðið og hann fer niður á höfða. Ég byrjaði á að labba efst upp og fer að kasta þar maðk, síðan færi ég mig smátt og smátt aðeins niður með bakkanum. Á einum spottanum er manni aðeins hætt við að sökkva niður í drullu og því betra að standa á bakkanum (maður er nú reyndar ekki mikið að vaða þarna - þeir eru vanalega bara rétt upp við bakkann). Ég kastaði því orminum nokkuð upp fyrir mig og lét hann reka niður með straumnum, með alveg slakt á línunni, og fór síðan að taka línuna inn þegar hún var komin dálítið niður fyrir mig. Svo sé ég allt í einu að það er þessi væni lax að elta orminn hjá mér í rólegheitum, en hann snýr við akkúrat á því augnabliki sem ég sé hann. Nú var ekki langt þangað til að við áttum að hætta veiða, túrinn búinn. Góð ráð dýr... Svo ég byrja að kasta og kasta og hreyfi mig bara til og frá á þessum 30 metra kafla - ákvað að fara ekki neðar. Svo loksins eftir yfir 30 mínútur þá tekur hann! Og þá frekar langt útí ánni. Og ég hafði ekkert séð eða orðið var við allan tímann. Mikið gasalega var ég skíthræddur um að missa hann þarna, en ég náði að landa honum þegar um 15 mínútur voru eftir af veiðitímanum okkar - alveg með lífið í lúkunum. Túrnum reddað...

Bókaflokkar sem engan enda ætla að taka - Partur II

2007-11-27T00:49:00.000Z

Hmmm.... búinn að hugsa þetta aðeins betur. Sumar bækurnar í Foundation seríunni eru með því besta sem ég hef lesið svo ég hefði nú ekki viljað missa af þeim þótt Asimov hafi ekki klárað seríuna. Síðustu Foundation bækurnar voru þannig lagað langt frá upphaflega söguþræðinum og þar var höfundurinn að sameina Foundation, Robots og Empire seríurnar. Svipað með Dune bækurnar. Fyrsta Dune bókin getur alveg staðið ein og sér og síðan er hægt að telja saman einnig saman þrjár fyrstu. Þannig að ekki hefði ég viljað missa af þeim (sonurinn lauk síðan við seríuna ásamt öðrum höfundi). Err... telst ég þarna vera kominn í hring? En allavega... ekki byrjað á fleiri ókláraðuðum seríur... í bili...

Bókaflokkar sem engan enda ætla að taka - Partur I

2007-11-26T18:05:00.000Z

Eitt sem ég ætla að hætta að gera. Það er að kaupa bækur í bókaflokkum sem höfundarnir eru ekki búnir að ljúka við. Merkilegt nokk en það kemur nefnilega fyrir að höfundarnir deyja áður en þeir ná að klára síðustu bókina í seríunni. Isaac Asimov (höfundur I Robot) skrifaði hinar frábæru Foundation bækur en síðasta bókin, Foundation and Earth, endaði eiginlega í lausu lofti og kallinn dó áður en hann náði að klára dæmið (skv. ekkju hans þá ku hann hafa sjálfur sagt að hann vissi ekki hvernig hann ætti að halda áfram eftir Foundation and Earth). Frank Herbert skrifaði nokkrar Dune bækur (sú fyrsta er mest selda vísindaskáldsaga frá upphafi) og eins og hjá Asimov endaði sú síðasta líka í lausu lofti. Nýjasta dæmið er Robert Jordan sem skrifaði Wheel of Time bækurnar, bókarflokkur sem byrjaði mjög vel en ku víst vera ansi teygður í seinni bókum (ég er á bók nr. 5) - Robert Jordan dó núna í sumar og náði ekki að klára 12 og síðustu bókina en skildi eftir sig eitthvað efni þannig að menn halda að ekkjan og útgefandinn munu fá einhvern til að ljúka við síðustu bókina (sem verður þá líklega skipt i tvennt - það er ku víst vera það mikið af lausum endum sem átti að hnýta í síðustu bókinni að hún gæti orðið of stór fyrir staka bók). Svo er nú eins gott að Stephen Donaldson nái að klára síðustu bókina í Covenant seríunni, búinn að gefa út 8 bækur og sú síðasta á að koma út 2009 (held ég).

Terry Pratchett

2007-11-25T08:43:00.001Z

Ég fór fyrir nokkru síðan að hlusta á bækur eftir Terry Pratchett (keyptar á www.audible.com), og hlusta þá aðallega á hljóðbækurnar í bílnum á leiðinni í og úr vinnunni (nota Apple Ipod og FM sendi). Discworld bækurnar hans eru algjör snilld, brilliant húmor. Ég er núna búinn að hlusta á 10 fyrstu bækurnar í seríunni + bók númer 19 (feet of clay) en Pratchett er búinn að skrifa 36 stykki og er ennþá að. Eins og vanalega þá hefur maður sem íslendingur takmarkaðan aðgang að vefverslunun eins og www.audible.com - sem er starfrækt í USA. Takmörkunin felst í því að maður getur ekki keypt allar bækurnar frá þeim. Í tilfelli Terry Pratchett þá hefur maður ekki aðgang að óstyttu útgáfunum af öllum hljóðbókunum hans sem er frekar pirrandi.

Núna er búið að þýða fyrstu Discworld bókina hans yfir á íslensku (Litbrigði galdranna) sem ég ætla nú reyndar að kaupa og lesa þótt ég hafi áður hlustað á hljóðbókina. Það verður forvitnilegt að sjá hvernig þýðingin hefur tekist. Áður hafa verið þýddar eftir Pratchett tvær fyrstu bækurnar, Trukkers og Diggers (sem ég hef lesið), úr Bromeliad þríleiknum en síðasta bókin, Wings, hefur ekki ennþá verið þýdd.

Nýtt tól til að blogga

2007-11-24T17:55:00.001Z

Ég uppfærði Windows Live Messenger í útgáfu 8.5 og í uppsetningarferlinu var boðið uppá ýmiss önnur tól frá Microsoft. M.a. Windows Live Writer, sem ég er einmitt að nota núna til að blogga. Nokkuð nett (og létt) forrit við fyrstu kynni og einfalt mál að tengja við Blogger.com/Blogspot.com. Kannski maður verði duglegur við að blogga núna á næstunni.

PS3... ojá

2007-11-24T11:14:00.001Z

Jebb - ég keypti semsagt PS3 fyrir þónokkru síðan. Er mjög ánægður með græjuna sjálfa. Mjög flottir leikir (sem ég hef ekki mikinn tíma til að spila) og góður háskerpu DVD spilari (blue ray). Jebb - ég er semsagt ennþá að spila tölvuleiki, orðinn 36 ára, og ætla halda því áfram þangað til yfir lýkur - og hananú! Lauk nýverið við Resistance - Fall of Man í co-op með einum félaganum sem er svipað ástatt með (tveir að spila saman gegnum leikinn - skemmtilegast þannig) og er núna að spila Oblivion og Call of Duty 4.

p.s. (ekki pc) ég er með nagladekk undir á bílnum mínum.

Er Ísland tilvalið fyrir....?

2007-11-23T17:31:00.001Z

Það er gömul (og þreytt) klisja að Ísland sé tilvalið tilraunasvæði fyrir ýmsa nýja tækni vegna þess hversu nýjungagjarn landinn sé. Eitt lítið smáatriði sem virðist vera hindra þetta, þ.e.a.s. það ku víst aðeins búa um 300. þús. eintök af okkur hérna á skerinu. Það sem fer eintaklega mikið í taugarnar á mér er að við höfum ekki aðgang að hinum ýmsu vefverslunum sem dreifa efni á rafrænan hátt til viðskiptavina sinna og auka um leið á notagildi viðkomandi "græju", t.d. er ekki greið leið fyrir íslendinga að iTunes, PS3 (PSN), XBox 360, Wii og PSP vefverslununum. Sem PS3 eigandi finnst mér það ansi fúlt að PS3 vefverslunin skuli vera lokuð fyrir ákveðin lönd, eitthvað sem var ekki uppi á borðinu fyrr en þónokkru eftir að vélin var komin á markað (og ég búinn að kaupa gripinn).

Kjarrá í Borgarfirði

2007-08-29T20:42:00.000Z

Datt heldur betur í lukkupottinn. Komst óvænt í laxveiði í Kjarrá í Borgarfirði. Fór á sunnudag og kom heim aftur í dag, með sjö laxa. Frábær ferð í alla staði, kokkur og tilheyrandi þjónusta á staðnum, heitur pottur og gufa - ágætis lúxus. Það eru leyfðar sjö stangir í ánni í einu og yfirleitt tveir um stöng en hópurinn okkar náði alls 73 stykkjum á land. Í Kjarrá má aðeins veiða á flugu þannig að ég var nú ekki bjartsýnn á að ég mundi fá eitthvað (ekki laginn á flugu) en náði aðeins að laga kastið hjá mér þannig að þetta fór bara nokkuð vel. Reyndar náði ég að brjóta stöngina mína í dag á síðasta klukkutímanum. Var nýbúinn að missa einn vænan (vantaði bara agnarlítið uppá að hann kæmi uppá land), hvíldi þá hylinn í 10 mín og síðan kom lax á í fyrsta kasti eftir hvíldina. Afrekaði að hrasa með stöngina þegar ég var að ná honum upp á þurrt þannig að hún stakkst niður og brotnaði - en ég náði þó laxinum. Sem betur fer er þetta stöng (Sage) sem er með lífstíðarábyrgð (skiptir ekki máli hvernig maður brýtur hana). Nú þarf ég bara að finna blessað ábyrgðarskírteinið.

WGA rusl

2007-08-25T20:38:00.000Z

Hlaut að koma að því... og kemur svosem ekki á óvart - þ.e. WGA miðlarar Microsoft ku liggja niðri sem veldur því að Windows Vista og Windows XP geta verið merkt sem óleyfileg (i.e. non-genuine) með tilheyrandi skerðingu á virkni stýrikerfisins. Kannski eins gott að bíllinn hjá manni skuli ekki vera meira tölvustýrður heldur en hann er, annars gæti maður átt á meldingu eins og t.d. "Því miður. Þú ert ekki að keyra með leyfilegt eintak af Windows Car OS (tm) og fær því ekki að taka hægri beyjur né bremsa lengur en í 3 sekúndur fyrr en þú hefur keypt leyfilegt eintak af Windows Car OS (tm)"

Mánudagur í Búdapest

2007-05-21T21:24:00.000Z

Dagurinn fór að mestu í fundarhöld. Við hættum kl. 17 og síðan var hist aftur um kl 19 og farið í siglingu á Dóná og borðaður kvöldmatur um borð. Búdapest er falleg borg, mikið af fallegum byggingum - og þinghúsið er sérstaklega stórfengleg bygging. Ekkert smá átak sem hefur þurft eftir seinni heimstyrjöldina til að byggja borgina upp aftur - um 80% af Búdapests var í rúst eftir stríðið, svipað og í mörgum öðrum borgum Evrópu, en þó - bardaginn um Búdapest er borin saman við bardagana um Stalingrad og Berlin.

Í Búdapest með nesti og nýja skó

2007-05-19T22:22:00.000Z

Hóhó... ég er í Búdapest, Ungverjalandi. Kom hingað á föstudaginn og fer til baka á Klakann á fimmtudag. Er einn hérna í vinnuferð en hef helgina til að skoða mig um, vinnan byrjar þannig lagað ekki fyrr en á sunnudagskvöld (já - ok það er kannski ekki réttlætanlegt að kalla kvöldverðarboð vinnu - en ég þarf að mæta og og má ekki mæta í sundskýlu einum fata). Í dag fór ég í þennan hefðbundna skyldulabbitúr, þ.e. labbitúrinn þar sem arkað er af stað niður í bæ í ómögulegum skóm þannig að maður er kominn með ágætis blöðrur strax eftir nokkra kílómetra. Já - eftir um 2 kílómetra labb var ég eiginlega búinn að fá nóg, fann skóbúð og keypti þar of litla sandala (hefði mátt vanda mig aðeins betur). Ég sirkaði út skóna sem mér sýndist að færu best með þessum splunkunýju blöðrum sem ég var kominn með á báða fæturna og spurði búðarkonuna á ensku hvort ég gæti mátað..... ekki var hún sleíp í ensku konan, talaði bara við mig á ungversku allan tímann en spurði mig þó: "prófa?" - já eitthvað sameiginlegt með okkur. A.m.k. kann ég núna eitt orð í ungversku.

Ókeypis öryggisskönnun í boði Secunia

2006-12-09T12:53:00.000Z

Ég hef verið á póstlista hjá Secunia fyrirtækinu sem vaktar hvaða veikleikar eru í gangi í hinum og þessum forritum, hvort sem er á Windows, Linux, MacOS, Solaris o.s.fr. Ég hef síðan síað út það sem skiptir ekki máli fyrir það umhverfi sem við erum með í vinnunni. Það geta verið ansi margir veikleikar sem koma upp á degi hverjum, t.d. 21 stk. núna síðasta föstudag. Það hefur verið vandamál að fylgjast með hvort hin og þessi forrit frá mismunandi framleiðendum séu "up-to-date", allir hafa þeir mismunandi leiðir til að láta notendur vita af nauðsynlegum uppfærslum á forritum sínum - ef þeir gera það yfirleitt. En Secunia var að koma með ágætt "On-Line" tól sem getur eitthvað hjálpað til við þetta. Tólið notast við Java keyrsluvélina og skannar tölvuna þína og kemur með lista yfir forrit sem eru í lagi og þau forrit sem vitað er að þarfnist uppfærslu, ásamt grunn leiðbeiningum hvað eigi að gera. Slóðin á þetta tól er http://secunia.com/software_inspector/ um að gera að prófa keyra þetta a.m.k. einu sinni, hentar kannski ekki vel til notkunar í tölvuumhverfi fyrirtækja nema fyrir svona stikkprufur, en prýðilegt fyrir heimatölvur, grunnkröfurnar eru:

Windows 2000, Windows XP, eða Windows 2003
Sun Java JRE 1.5.0_06
Internet Explorer 6.x, Opera 9.x, or Firefox 1.5.x
Nýjasta útgáfan af Microsoft Windows Update

Hmm... nei ekki ennþá stuðningur við Vista :)

IE7 kominn út og ....

2006-10-19T11:15:00.000Z

strax búið að finna veikleika í honum. Já það tók ekki langan tíma. Ég sá fréttir á netinu í gærkvöldi um að nýja útgáfan af vefráparanum frá Microsoft, Internet Explorer 7 , væri komin út og strax núna í morgun voru menn búnir að finna veikleika í honum, sjá hérna. Menn eru nú líklega ekki ánægðir í herbúðum Microsoft með þetta - en líka spurning hvort menn voru ekki búnir að finna veikleikann í betunni af vefráparanum og biðu með að tilkynna hana þangað til að endanleg útgáfa kom út, svona til að fá meiri athygli - oft eru þetta ráðgjafar sem finna þessa veikleika og þeir eru jú m.a. að reyna vekja athygli á sjálfum sér og sinni þjónustu, skapa sér nafn í geiranum. Veikleikinn er þannig að ef þú ert t.d. með margar síður opnar, t.d. netbankann þinn og einhverja aðra síðu foo, þá gæti sá aðili sem hýsir síðu foo komist í upplýsingar frá netbankasíðunni. En það er svosem einfalt að koma í veg fyrir þetta - nefnilega að vera ekki að skoða neitt annað þegar maður er á einhverri vefsíðu sem hugsanlega inniheldur gögn sem maður vill ekki að leki neitt út.

Tómas Orri í heimsókn í vinnuna

2006-10-16T21:34:00.000Z

Tómas Orri kom í heimsókn í vinnuna til mín í dag. Guðrún Herdís hafði nefnilega verið hjá mér í vinnunni um daginn og hann var eitthvað farinn að kvarta yfir því að hann fengi ekki að fara í heimsókn í vinnuna til hans Pabba eins og stóra systir. Þannig að þegar Kristín fór með Guðrúnu Herdísi í ballett í dag þá skutlaði hún Tómasi Orra í heimsókn til Pabbans í leiðinni. Hann unir sér nú ekki alveg eins mikið inni á skrifstofu hjá mér eins og eldri systirin kallinn - enda svosem ekki skrítið. En ég átti ennþá ofaní skúffu hjá mér eitthvað dót frá því að Guðrún Herdís kom fyrir löngu löngu síðan - og dró það upp núna fyrir hann, tússlitir og form til að strika eftir. Það hélt athyglinni svosem ekki lengi - hann er nú meira gefinn fyrir leikfangadýr, kubba og bíla heldur en eitthvað litastúss. En við náðum að draga upp nokkrar myndir þarna í sameiningu áður en við fórum heim. Ég prísa mig bara sælan að hafa munað eftir að taka til á borðinu áður en við fórum heim. Einhver hefði kannski farið að spá í hvað í ósköpunum ég væri að gera í vinnunni yfir daginn ef viðkomandi hefði séð tússlistaverkin eftir soninn liggjandi á borðinu.

Betan af Blogger.com og Google docs

2006-10-11T21:55:00.000Z

Loksins virkaði það að uppfæra mátskjalið fyrir bloggið í betunni frá Blogger.com. Ég er svosem ekki búinn að leika mér neitt mikið með þetta - bætti við RSS efnisveitu frá SciFi Wire. Missti við þetta út sérbreytingar sem ég var búinn að gera á mátskjalinu, en ég átti von á því. Set þær inn aftur seinna. En kerfið sem slíkt er orðið miklu sneggra og léttara heldur en það var áður. Manni dettur í hug AJAX (nei ekki þvottaefnið!). En jamm, svo tæknin þrammar áfram, eitt skref í einu, og stundum tvö afturábak - hó hvað þetta var mikil klisja :)

Jeminn.... maður fær nú bara svona ómægod fíling.... svona tölvunjarðarlega séð.... Þegar ég var að pósta út bloggið (eins gott að íslenskukennarinn minn frá ML sjái þetta ekki) þá komu upp þessi skilaboð:

Write. Share. Post.
New! Post to Blogger from Google Docs & Spreadsheets.

Mennirnir eru barasta alltaf að tengja...

Google Docs & Spreadsheets

2006-10-11T21:25:00.000Z

Kemur ekki á óvart en Google er að mjaka sér meir og meir inná það sem hingað til hefur verið algjört yfirráðasvæði Microsoft. Núna seinast með Google Docs & Spreadsheets. Og þeir halda áfram með að tengja gmail aðganginn manns við aðgang að þjónustum Google. Gekk frekar snurðulaust fyrir sig, fór inn á http://docs.google.com/ og þá pikkaði Google strax upp gmail aðganginn minn og ég var kominn með aðgang og eigið svæði á 2 sek. Sýnist þetta vera nokkuð svalt hjá þeim - svosem ekki von á öðru. Svar Microsoft við þessu verður líklega það (skv. þeirri fiskisögu sem flýgur um á netinu) að Microsoft Works verður gert að hýstri þjónustu svipað og Google er að gera með Google Docs & Spreadsheets.

Hmmm.... svalt... hægt að vista niður í ýmiss snið

Og tæknin þrammar áfram...

2006-10-08T22:28:00.000Z

Var að fara með bloggið í einhverskonar beta útgáfu af blogg kerfinu frá blogger.com. Ein breytingin er að þá er maður að nota @gmail.com aðganginn til að auðkenna sig inná kerfið fyrir blogg aðganginn - sem er svosem ágætt. Þeir virðast m.a. vera koma með svipaðan "drag & drop" fítus til að hanna bloggsíðuna sjálfa, svipað og er með RSS hlutina sem maður getur raðað á manns eigin google heimasíðu (http://www.google.com/ig?hl=en) , en til þess að virkja það þá þurfti maður víst að uppfæra mátskjalið eitthvað fyrir bloggið og það virkaði nú ekki alveg hjá þeim fyrir bloggið mitt - líklega þessvegna sem þetta kallast ennþá beta útgáfa.

Annars var ég að finna snilldarapparat fyrir Nokia 9300i símann sem ég er með, virkar fyrir þá síma sem eru með Java. Nefnilega RSS lesari á símann. Þannig að nú getur maður, á sama hátt og á Google heimasíðunni, sett inn RSS áskriftir sem verða aðgengilegar á símanum. Fínt til að fylgjast með fréttum. Er nú þegar búinn að setja RSS vísanir fyrir gamla góða moggann þarna inn. Herlegheitin eru aðgengileg á http://www.widsets.com

Ansi góðar tilvitnanir...

2006-10-06T00:34:00.000Z

og ekki skemmir að það er sannleikskorn í sumum. Það koma stundum upp góðar tilvitnanir frá tilvitnanabankanum sem ég er með tengt í hérna til hliðar á bloggsíðunni. Þessi er ansi góð:

The problem with political jokes is they get elected.
Henry Cate VII

Fletti um daginn upp nokkrum eftir grínistann George Burns (gamli maðurinn með vindlinginn í Grumpy Old Men), margir déskoti góðir hjá honum. Til dæmis þessi:

If you live to be one hundred, you've got it made. Very few people die past that age.
George Burns

p.s. George Burns fæddist 1896 og dó 1996

Woody Allen er góður líka, margar góðar línur sem hafa komið í myndunum hans:

I can't listen to that much Wagner. I start getting the urge to conquer Poland
Woody Allen

Og síðan er það snillingurinn Groucho Marx:

Military intelligence is a contradiction in terms.
Groucho Marx

Plássvandræði á C-drifi og atburðaskrár

2006-10-02T01:55:00.000Z

Og maður kallar sig tölvunjörð... Hálf imbalegt að hafa ekki fattað þetta fyrr. Ég er semsagt búinn að vera lengi í plássvandræðum með C-drifið á tölvunni minni, og var alveg við það að fara strauja aukadiskinn í vélinni (sem er með Linux stýrikerfi) til að fá meira pláss þegar ég fann sökudólginn. Júbb... það er víst hollt að athuga hvort að forrit sem skráir nákvæma atburðasögu geri það nokkuð "alltof nákvæmlega" - það kostar víst eitthvað pláss að geyma slík gögn. Ég komst að því að eitt forritið sem ég nota til að stjórna hvað kemst inná tölvuna mína og hvað ekki (ekki beint eldveggur samt) var búið að eyða frekar miklu púðri í að skrá hvað hefur verið að gerast á tölvunni minni. Jamm & jæja... kippti því í liðinn.... og 120 GB diskurinn sem hefur verið þvísemnæst fullur í dálítið langan tíma með tilheyrandi vandræðum er núna með um 60 GB laus!!!

Gustav Holst og "The Plantes" & Plútó

2006-10-01T20:05:00.000Z

Ætli Gustav Holst hefði ekki verið glaður þegar Plútó var flokkuð út úr samfélagi plánetna í sólkerfinu okkar fyrir stuttu. Fimmtán árum eftir að hann samdi snilldarverkið "The Plantets" þá fann bandaríski stjarnfræðingurinn Clyde Tombaugh Plútó. Holst bætti nú aldrei Plúto hluta við tónverkið en hann dó þremur árum eftir að Plútó fannst. Hann hlýtur nú samt að hafa bölvað - bara oggulítið - við fundinn. Það er sagt að Holst hafi ekki haft neinar fyriráætlanir um að bæta Plútó við verkið sitt, en það stoppaði svosem ekki Colin Matthews í því að bæta við verkið og semja sér Plútó hluta við það, sá hlýtur að bölva núna. En semsagt: Gustav Holst hafði þá rétt fyrir sér eftir allt saman.

p.s. Um að gera að prófa að hlusta á þetta tónverk. Sjálfum finnst mér Júpiter flottasti hlutinn - rétt rúmum þremur mínútum inn í því lagi kemur ein flottasta tónlist sem ég hef heyrt. Síðan er Mars lagið skemmtilega kröftugt - eitthvað sem sá sem samdi tónlistina fyrir Aliens myndina hans James Cameroon hefur verið sammála mér um þegar hann þurfti eitthvað kröftugt stef fyrir eitt aðal spennuatriðið. Stefið í myndinni er auðheyranlega fengið að láni úr Mars.

Myrkvun í Rvk.

2006-09-28T22:11:00.000Z

Þvílík endemis vitleysa sem þessi myrkvunargjörningur er. Myrkvið hefur uppá svo margt að bjóða sagði Andri Snær Magnason í viðtali í sjónvarpinu áðan, ég nennti nú ekki að horfa á allt viðtalið - þessi setning var eiginlega alveg nóg. Mitt ráð til Andra Snæs: Farðu að sofa.

Laxveiði í Svarthöfða í Borgarfirði

2006-09-21T20:47:00.000Z

Fór í laxveiði í Svarthöfða í Borgarfirði um daginn, fékk alls 5 laxa og tvo sjóbirtinga. Mjög góð ferð enda algjört toppstaður. Seinni daginn, um morguninn var ég að veiða á maðk og það kom einn á sem sleit eins og skot - og sleit þannig að það var augljóst að línan hefur verið eitthvað slöpp eða sargast af við stein því bremsan á hjólinu var alveg akkúrat stillt og það náði ekki einu sinni að reyna á hana. Ekki nema hvað - eftir hádegi þá fer ég neðar í ána og prófa devon. Eftir að hafa kastað í smá tíma þá festi ég í einhverju. Jamm og jæja - ég byrja að hala inn. Svo sé ég að devoninn stendur eins og í lausu lofti strengdur út í á... hmmm.... eins og ég hafi fest í einhverjum girnisspotta. Svo finn ég að það er eitthvað sem kippir í!!! Úps.... nú var um að gera að ná að grípa í spottann áður en hann losnaði af því ég gat ekki séð að það væri nein flækja sem ég hefði fest í. Ég náði að teygja stöngina það langt fyrir aftan mig með annari hendinni þannig að ég gat með hinni teygt mig í línuna sem ég hafði fest í. Þegar ég hafði náð í línuna og vafið henni um hendina á mér (já ég endaði á því að skera mig á girninu) þá sá ég að skammt frá bakkanum synti þessi væni lax. Nú var stönginni hent frá í snarheitum, ríghaldið í girnisspottann og reynt að ná gripnum á land. Og eftir smá stund kom í land þessi væni 5 punda lax, ennþá með girnið, segulnaglann, öngulinn og orminn sem hann hafði nappað af mér um morguninn. Feigur var hann blessaður.

Toshiba og HD-DVD græjur í evrópu

2006-09-04T22:24:00.000Z

Toshiba mun koma með HD-DVD (háskerpu DVD, næsta kynslóð DVD tækninnar) græjurnar sínar fyrir evrópumarkaðinn fyrst í nóvember og síðan aðeins öflugri spilara í desember (1080p og dolby digital 5.1, hdmi 1.3). Ég hef aðeins verið að lesa mig til um fyrstu myndirnar sem hafa komið út í Blue Ray (frá Sony) og HD-DVD (frá Toshiba) og gæðalega þá virðist HD-DVD hafa vinninginn. Menn eru yfirleitt hundóánægðir með Blue Ray gæðin þegar þeir eru að bera þau saman við HD-DVD. Svo HD-DVD er víst málið. Þá er bara að betri tæknin vinni kapphlaupið, sem er víst ekki öruggt sbr. það að Beta ku víst hafa verið betri tækni heldur en VHS en varð samt undir. Sony á síðan ekkert gott skilið eftir fíaskóið hjá þeim með 'rootkit'-ið sem þeir settu á tónlistardiskana sína. Þetta 'rootkit' var síðan notað af hökkurum til að brjótast inn á tölvur þeirra sem höfðu fengið það inn eftir að hafa spilað diskana frá Sony á tölvunni sinni. Til að kóróna þetta þá var síðan líklega kóði í þessu 'rootkit'-i frá þeim stolinn frá OpenSource (þ.e. verndaður af GPL og því ólöglegt að dreifa honum nema kóðinn sjálfur fylgdi með). Það er óvíst hvað Playstation 3 frá Sony kemur til með að breyta í þessu háskerpu DVD-sniðs stríði, virðist sem Sony sé að klúðra einhverju þar líka. En a.m.k. þá vona ég nú bara að HD hafi þetta - verst hvað spilararnir verða helv. dýrir (€999 flottari týpan). Það er einn aðili hérna á klakanum farinn að selja Blu Ray og HD-DVD myndir (þótt spilararnir séu ekki komnir, enda segist hann ekki hafa selt neina mynd ennþá) og þær eru nokkuð dýrari heldur en venjulegar DVD, og síðan eru Blu Ray myndirnar dýrari heldur en HD-DVD.

Varúð. Biluð brú.

2006-09-03T10:41:00.000Z

Skilja erlendir túristar þetta? Frekar skrítið vegaskilti sem varð á vegi okkar á leiðinni að Svínafellsjökli (myndin er tekin á leiðinni til baka). Hvað er eiginlega að brúnni? Hmmm... Er í lagi að keyra yfir? Síðan hafa menn ekki haft fyrir því að festa skiltin almennilega upp, hinum megin við brúna var skiltið fokið um koll.

Peter Jackson & ekki-endurgerðir?

2006-09-02T00:06:00.000Z

Mikið væri nú óskandi að þetta sé satt. Skv. þessari frétt þá ku New Line Cinema vera með áætlanir með að kvikmynda "The Hobbit" á næsta ári. Stendur reyndar ekkert um leikstjórann en varla kemur annar til greina heldur en Peter Jackson. Svo kannski er hann ekki bara í endurgerðum (nýbúinn með King Kong og Dam Busters framundan).

Svínafellsjökull

2006-09-01T00:01:00.000Z

Fórum m.a. upp að Svinafellsjökli í sumarfríinu okkar. Tilvalið umhverfi til að ná jólakortsmyndum af börnunum, en þau sönnuðu í staðinn enn eitt lögmálið: Ef verið er að taka mynd af þremur börnum þá er a.m.k. eitt að gera eitthvað sem er ekki heppilegt fyrir myndatökuna. Smellti nokkrum myndum þarna uppfrá, og þessi er einna skást.

Sú yngsta er nú ekkert mjög sátt á myndinni (og búin að fá nóg af þessu myndatökustússi) en það var annars mjög gaman að koma þarna alveg upp að jöklinum. Flott umhverfi.

Peter Jackson og endurgerðir

2006-08-31T21:46:00.000Z

Hmmm.... getur blessaður maðurinn ekki komið með eitthvað annað heldur en endurgerð á eldri mynd. Peter Jackson ætlar semsagt að endurgera The Dam Busters, sem fjallar um hvernig bretar eyðilögðu stíflu fyrir þjóðverjum í seinni heimstyrjöldinni. Sá þessa mynd fyrir löngu síðan og man lítið sem ekkert eftir henni - svo það verður forvitnilegt að sjá hvað kappinn gerir. Fyrst munum við þó líklega sjá nafnið hans notað óspart þegar myndin Halo kemur út, sem byggir á samnefndum tölvuleik frá Microsoft. Jackson kemur m.a. að framleiðslu þeirrar myndar en líklega er bara verið að kaupa nafnið hans með til að geta haft það á auglýsingaspjaldinu: "From the director of the LORD OF THE RINGS", ojá - ætti að trekkja eitthvað að.

Costa Rica

2006-08-25T20:54:00.000Z

Linda systir og Sóley dóttir hennar eru farnar til Costa Rica. Linda verður þar í námi í eitt ár í Friðarskóla Sameinuðu Þjóðanna en hún verður þFoo...ar í mastersnám í alþjóðalögfræði og mannréttindum. Dálítið ævintýri í þessu hjá þeim að smella sér til Costa Rica. Þær halda úti bloggi á http://soleylinda.blogspot.com/, sem er skemmtileg lesning.

Gnístur - Skelfing að heyra

2006-08-17T21:27:00.000Z

Nú er Hjördís Ylfa orðin 7 mánaða og komin með tvær pínupons tennur í efri góm og tvær pínupins tennur í þann neðri. Ósköp sætt þegar hún brosir... en það er öllu verra þegar hún er að gnísta tönnum. Alveg skelfilegt að heyra þessi óhljóð þegar hún er að þessu. Úff...

Annars þá fékk ég heiftarleg fráhvarfseinkenni frá fríinu mínu þannig að ég hef ákveðið að endurnýja kynni mín við fríið í nokkra daga í næstu viku. Erum semsagt á leiðinni aftur í frí.

Fríið búið

2006-08-07T20:43:00.000Z

Þá er blessað fríið búið. Jamm, byrja aftur í vinnunni á morgunn. Eitt af því sem ég ætlaði að gera í þessu sumarfríi var að klára að lesa a.m.k. þrjár bækur (fyrir utan þær sem tengjast vinnunni), þ.e. bækurnar Wolves of the Calla eftir Stephen King, The Lost Gospel eftir Herbert Krosney og Behold the Man eftir Michael Moorcock sem vann Nebula verðlaunin á sínum tíma. Af þessum þremur náði ég bara að klára Moorcock bókina, er hálfnaður með Krosney, og búinn með 1/4 af King.

Stephen King bókin er hluti af The Dark Tower seríunni (sjö bækur alls) en fyrstu bókina las ég um 1986 (minnir mig) og síðasta bókin kom út 2004. Alveg gasalegt hvað maður hefur þurft að bíða lengi eftir því að herra King kláraði seríuna, og síðan alveg ótrúlegt hvað ég hef sjálfur dregið það lengi að klára seríuna (eins og hún er góð - a.m.k. þessar fjórar fyrstu sem ég er búinn með).

Bókin eftir Krosney, The Lost Gospel er algjör snilld - a.m.k. sá hluti hennar sem ég er búinn með. Það var sýndur þáttur um þetta sama efni fyrir stuttu í ríkissjónvarpinu en bókin fjallar um hvernig Júdasargjuðspjallið fannst, týndist aftur (þ.e. var stolið), fannst aftur og eyðilagðist næstum því vegna lélegrar meðhöndlunar (en skemmdist mikið), og vinnunni við að bjarga því sem bjargað varð af texta guðspjallsins. Mjög góð bók.

Moorcock bókin er síðan vísindaskáldsaga, eða öllu heldur tímaflakksskáldssaga, og fjallar um mann sem ferðast aftur til tíma Jesú Krists og kemst að því að Jesús getur ekki uppfyllt hlutverk sitt. Söguþráðurinn sem slíkur var nokkuð fyrirsjáanlegur bara út frá samantektinni sjálfri aftan á bókinni en hún var góð fyrir því. Skrítið að maður hafi ekki heyrt neitt um að kristnir menn hafi orðið gjörsamlega gufuvitlausir vegna þessarar bókar þegar hún kom út á sínum tíma (árið 1969). Ég las á sínum tíma bókina eftir Salman Rushdie, Söngvar Satans, og fannst að það hefði ekki átt að koma neinum á óvart öll lætin sem urðu útaf þeirri bók - en bókin eftir Moorcock er ekkert síður stuðandi fyrir kristna menn eins og Söngvar Satans var fyrir múslima, sérstaklega fyrir kaþólska þar sem María Mey fær ansi slæma útreið í bókinni, ja.. og hvað þá fyrir alla kristna menn vegna lýsingarinnar í bókinni á Jesú Krist sjálfum sem er lýst sem "slefandi hálvita".

En semsagt 33% árangur í bókalestri í sumarfríinu.

Ekkert kjaftæði, framvegis pöntum við pítsu

2006-07-25T01:01:00.000Z

Já sko ekkert kjaftæði, framvegis pöntum við pítsu!!! A... þetta þarfnast líklega nánari útskýringar. Uppáhaldssaga konunnar minnar undanfarið hefur verið sagan af því þegar við vorum með heimatilbúna pítsu í matinn um daginn. Ég fékk m.a. það verkefni að setja herlegheitin í ofninn, sem ég gerði. Þetta á ekki að vera flókið mál en... Þegar mér sýnist pítsan vera orðin tilbúin þá slekk ég á ofninum og tek hana út. Hvað haldið þið að ég sjái á ofngrindinni þegar ég lifti pítsunni upp - debet kortið mitt, vel bakað. Þá hafði ég semsagt skilið kortið eftir á borðinu, lagt pítsuna ofan á kortið og síðan fylgdi kortið með pítsunni inn í ofninn. Ergo - ekkert kjaftæði, framvegis pöntum við pítsu.

Múli í Dýrafirði

2006-07-24T01:35:00.000Z

Í í byrjun júlí leigðum við ásamt vinafólki okkar sumarbústað í Dýrafirði, nánar tiltekið Múla í Dýrafirði, rétt hjá Kirkjubóli, sem er rétt fyrir utan Þingeyri. Frábært frí – þótt veðrið hafi ekki verið uppá marga fiska. Útfrá bústaðnum fórum við síðan í ferðir á mínar heimaslóðir, þ.e. Bíldudal, og einnig á Flateyri og Ísafjörð, og skoðuðum síðan einnig Skrúð sem er rétt hjá Núpi í Dýrafirði.

Rétt áður en við fórum í ferðalagið þá létum við skipta um tímareim í Fordinum. Eitthvað fór sú viðgerð skakkt í gripinn því bílinn var algjörlega kraftlaus eftir gjörninginn, sem olli því að við þurftum að lulla suma fjallvegina í 1-2 gír þegar 3-4 hefðu áður dugað. Semsagt rólegheita akstur hjá okkur á fjallvegum Vestfjarða. Svo komst þetta í lag sisona, án þess að við gerðum neitt - a.m.k. er kagginn fínn núna.

Blessaður Fordinn er orðinn frekar plásslítill fyrir okkur. Þegar farið er í svona langt frí þá er ýmislegt sem þarf að fljóta með fyrir 5 manna fjölskyldu, barnavagninn tekur sitt o.s.fr. Við ákváðum því að kaupa tengdamömmubox fyrir ferðalagið. Keyptum eitt 310 lítra box á um 25. þús. og síðan þurfti einnig að bæta við þverbogum Hmm... en ég hef semsagt komist að því að sama lögmál gildir um pláss í bíl þegar farið er í ferðalag og pláss á harða diskinum í tölvunni, það er sama hvað þú stækkar plássið mikið þú fyllir það alltaf eins og skot. Það fór semsagt þannig að bíllinn var smekkfullur af farangri og tengdamömmuboxið einnig. En jæja – þetta komst allt fyrir. Við ákváðum að taka flóabátinn Baldur yfir Breiðafjörð og keyrðum því til Stykkishólms. Ferðin með nýja Baldri átti víst bara að taka að taka tvo tíma og ferðin með honum yrði ágætis hvílt frá akstrinum áður en lagt væri í hina rómuðu vegi Vestfjarða. Rétt áður en við keyrðum yfir heiðina áður en maður kemur að Stykkishólmi þá fór að heyrast nýtt skrölt í bílnum. Hmmm.... ekki gæfulegt. Síðan sá ég í hliðarspeglinum hvar einn gönguskórinn minn skoppaði eftir malbikinu, úps..., bíllinn stoppaður, skórinn sóttur og málið athugað betur – jú blessað tengdamömmuboxið var opið!!! Þá er semsagt hægt að klúðra læsingunni svona allhressilega þannig að krókurinn á lásunum tveimur liggja einhvernveginn framhjá öllum festingum. Yfirvaldið brosti ekki breitt til mín þegar það kom í ljós að blái pokinn með útifötum barnanna ásamt ýmsum öðrum fötum prjónuðum af tengdó og Yfirvaldinu var ekki lengur í boxinu. Tvöfalt úps... Við snerum við og keyrðum til baka en sáum blessaðan pokann ekki, en urðum svo að hætta leitinni fljótlega til að missa ekki af bátnum. Ekki gaman. Það var síðan hringt í gemsann minn um kvöldið, og þá hafði pokinn fundist (föt barnanna voru merkt), og ég fékk pokann sendan með pósti á Þingeyri. Svo það rættist sem betur fer úr þessu.

Veiðivötn

2006-07-16T01:47:00.000Z

Þá er Veiðivatnatúrinn búinn í ár. Fékk 9 stykki, mestallt tittir - þeir stærstu voru 2 punda urriðar. Ég missti að sjálfsögðu þann stóra, alveg satt, það voru meira segja vitni að því... Meðan við vorum þarna (8 manna hópur) fengum við á okkur hávaðarok og rigningu, nema á fyrrihluta fimmtudagsins þá var ágætis veður. Það endaði með því að við rukum heim snemma á föstudaginn án þess að veiða neitt þann daginn þar sem okkur leist það illa á veðrið, spáði það miklu roki að bílarnir hefðu getað stórskemmst við að keyra yfir sandana (þ.e. verið vel sandblásnir).
Ég græjaði mig ágætlega í vöðlum fyrir ferðina en gömlu vöðlurnar voru farnar að leka í klofinu - frekar óþægilegt í veiði (og almennt) að vera með það á tilfinningunni að maður sé búinn að pissa í sig svo það var kominn tími til að endurnýja. En Adam var ekki lengi í paradís, þessar fínu og rándýru vöðlur voru eitthvað gallaðar, strax í fyrsta vatninu sem ég steig útí (Hraunvatn - fékk 5 stk. þar) fann ég að vöðlurnar láku við annan hælinn.
Og til að kóróna græjuvandræðin þá á degi tvö datt armurinn af veiðihjólinu mínu í einu kastinu - náði nú reyndar að háfa hann upp af botninum aftur en rónna á móti fann ég ekki - var sem betur fer með auka veiðihjól (af gerð (ambassador) sem tekur tíma að læra á) og fékk síðan annað lánað frá einum veiðifélaganum. En þrátt fyrir þessi vandræði og veðurvonbrigði var þetta fín ferð. Förum aftur að ári.

Glæsikerran & Veiðivötn

2006-07-11T18:55:00.000Z

Það hefur lengi staðið til að kaupa bíl númer 2, enda ekki annað hægt fyrir okkur en að eiga tvo bíla - ég að þjóta í og úr vinnunni, keyra börnin í barnaskóla, leikskóla, ballettíma o.s.fr., og ekki minnkaði þörfin á bíl nr.2 þegar við fluttum í Hafnarfjörðinn. En nú er þetta loksins komið í höfn - eftir mikið japljum&fuður þá fórum við í dag og keyptum Nissan Micra, spánýjan beint úr kassanum, sjálfskiptan. Vorum búin að flakka vítt og breitt á þessum markaði, frá jepplingum, 7 manna fjölskyldubílum en enduðum í sparneytnum smábíl. Vorum m.a. að skoða Toyota smábílana, þ.e. Yaris og hinn - þennan sem er ennþá smærri en Yarisinn en ég man aldrei hvað hann heitir, ypsilon eitthvað, en hann var bara 4 manna og datt þá sjálfkrafa út. Okkur sýnist semsagt að Nissan Micra sé hægstæðustu kaupin í dag. Fáum gripin líklegast afhentan á þriðjudag, kannski fyrr.

Í fyrramálið verður síðan lagt af stað í Veiðivötn og ekki komið aftur fyrr en seint á föstudag. Eitthvað lítið um maðk á markaðnum núna, en þá má alltaf prófa fluguna, spúninn og makrílinn - þó er ég ennþá handónýtur á flugunni en það hlýtur að koma með æfingunni, spurning um að fara á annað flugukastsnámskeið.

Canon 350D - þetta er agalegt

2006-07-09T03:17:00.000Z

Úff... pabbi keypti Canon EOS 350D vélina í síðustu viku. Og ég fékk hana lánaða, a... það hefði ég ekki átt að gera. Er búinn að smella af nokkrum og nú verð ég barasta að fá mér eitt stykki líka. Mun flottari myndir sem 350D vélin tekur heldur en Canon PowerShot S50 vélin sem ég á núna (enda kannski eins gott - smá verðmunur og allt annar klassi). Annars þá er ég að fara í veiðivötn núna á miðvikudaginn og það væri déskoti gaman að geta verið með svona grip þarna uppfrá - frekar mikil náttúrufegurð þarna og um leið ágætis myndefni.

Afritunarvörn á HD DVD & Blu-ray Disc til einskis?

2006-07-09T02:25:00.000Z

Þetta er nú eiginlega frekar fyndið. Framleiðendur næstu kynslóðar af DVD tækni hafa eitt mikilli orku í að reyna gera tæknina sem skotheldasta fyrir óleyfilegri afritun. En nú virðist sem það sé einfalt mál að framkvæma gjörninginn, tekur víst alveg hellingstíma, heilmikinn tíma, eða öllu heldur heilan helling af "print screen" skipunum. Já - með því að stoppa myndina, ramma fyrir ramma og framkvæma print screen þá er víst hægt að afrita myndina. Sjá meira um þetta hérna. Þetta er alveg sprenghlægilegt, það eru oft smáatriðin sem sleppa í gegn.

Frí... frí... frí... loksins... loksins... loksins...

2006-07-01T02:33:00.000Z

Jább & jibbí... ég er víst kominn í sumarfrí. Fer í sumarbústað í Dýrafirði á sunnudaginn og verð þar í tæpa viku. Ætli maður rúnti ekki smávegis yfir í Arnarfjörðinn og skoði gamlar heimaslóðir, sýni börnunum hvar maður átti heima o.s.fr. Verð síðan í fríi áfram út júlí. Annars er það orðin spurning hvað maður er mikið í fríi þannig lagað þótt maður sé ekki í vinnunni, maður er orðinn alltof vel tengdur - t.d. er klukkan núna orðin hálf þrjú þegar ég loksins drullast til að hætta vinna. Bévítans... þori að veðja að börnin vakna kl. hálf sjö eða fyrr í fyrramálið :(

Ojæja - ég get víst sjálfum mér um kennt.

Picasa Web Album-ið mitt

2006-06-26T00:57:00.000Z

Google heldur áfram að slá í gegn. Hef aðeins verið að fikta í þessu vefalbúms hluta Picasa sem þeir voru að koma með. Picasa er barasta orðið ansi flott og vinnur vel með öðrum Google tólum. Ekki bara það að maður geti sent mynd út á bloggið með Picasa og Hello, heldur getur maður núna sent myndir úr Picasa í vefalbúm á mjög auðveldan hátt. Ansi sniðugt - en eins og er þarf maður að sækja sérstaklega um aðgang að þessu og ekki endilega víst að allir komist að. En vefalbúmið mitt er semsagt hérna. Reyndar er þetta (eins og margt annað hjá Google) í betu, þ.e. tilraunaútgáfu. En virkar ágætlega. Þeir Picasa/Google menn gætu nú samt bætt "import" hlutann í Picasa, þ.e.a.s. þegar maður vill nota Picasa til að hlaða niður myndunum af myndavélinni þá er það frekar takmarkaðir möguleikar sem manni bjóðast. Ég vil setja myndirnar niður í möppur eftir tökudegi, eitthvað sem annars meingallaður canon hugbúnaðurinn sem fylgdi Canon PowerShot S50 vélinni minni býður uppá en er ekki hægt í Picasa.

Ekki sopið á kálinu þótt að í ausuna sé komið

2006-06-25T16:01:00.000Z

Jamm... við grilluðum skötusel í gærkvöldi, skötuselurinn er einn sá besti grillmatur sem ég hef smakkað, nammi namm - og þetta sem er svo gasalega ljótur fiskur. Þegar maður er að grilla þá er það "part af programmet" að fá sér einn léttann á meðan. Í þetta skiptið langaði mér nú ekki alveg til að fá mér bjór með heldur hvítvín og það vildi svo gífurlega heppilega til að ég átti eina flösku. Svo þá var ekkert eftir nema að opna flöskuna.... Og vúps.... ég þarf nú að finna betri tappatogara heldur en þennan. En þetta reddaðist nú. En hvað með það - ég mæli semsagt með skötusel á grillið.

Ferðatölvur sem springa

2006-06-21T18:57:00.000Z

Hó... já... ferðatölvur sem springa hvorki meira né minna. Sjá myndir af herlegheitunum hérna. Líklegast hefur eigandi tölvunnar ekki sinnt því að fá skipt út gölluðum íhlut sem einhverjir vilja meina að framleiðandinn (DELL) hafi verið búinn að auglýsa (rámar eitthvað í slíkt). En þetta kallar á ýmsa skemmtilega brandara, á Slashdot nefna menn svona atvik sem ástæðu að framleiðendur hætti að kalla svona tæki "Laptops" eða kjöltutölvur - hver vill hafa svona í fanginu þegar apparatið springur. Burn in DELL!!! er annar góður. En sá besti er sá að líklega hefur tölvan verið að keyra stýrikerfið Windows XPlode :)

Elephants Dream

2006-06-18T22:44:00.000Z

Forvitnilegt þetta. Frjáls kvikmynd eða teiknimynd öllu heldur. Teiknimyndin Elephants Dream var búin til með frjálsum hugbúnaði (open source) og myndin sem slík er ásamt "kóðanum" fyrir hana er opin öllum skv. "creative commons" leyfinu.

17. júní og pólítísk rétthugsun

2006-06-17T22:45:00.000Z

Mikið er ég nú orðinn þreyttur á hversu mikið pólitískri rétthugsun er troðið inn í alla umræðu. Ekki að ég sé einhver tepra en mér finnst nú einhvernveginn að presturinn sem hélt 17. júní ræðuna hérna í Hafnarfirði áður en það var lagt af stað í skrúðgönguna hefði alveg getað sleppt því að nefna kynhneigð sérstaklega í sinni ræðu - það var ekki þörf á því þar sem ræðan sem slík fjallaði um umburðalyndi. En menn verða víst að vera nútímalegir og tolla í tískunni, prestar líka.

En 17. júní hátíðin hér í Hafnarfirði var annars bara fín skemmtun. Góður andi yfir þessu öllu hjá Hafnfirðingum, a.m.k. þann tíma sem við vorum á svæðinu. Við fórum síðan heim nógu snemma til að ná handboltaleiknum við Svía, en svo entist ég ekki við að horfa á leikinn.

Kubuntu

2006-06-12T00:40:00.000Z

Fyrir þá sem ekki vita þá á ég það til að vera smá nýjungagjarn. Tók mig til um daginn þegar tölvuskriflinu þóknaðist að vera vakandi (sjá fyrri pósta) henti út Linux Fedora Core 5 og setti upp Linux dreifinguna Kubuntu. Kubuntu byggir á Ubuntu drefingunni, en munurinn felst í að í Kubuntu er búið að fjarlægja Gnome gluggakerfið og einungis notast við KDE gluggakerfið. En semsagt ég er búinn að vera skoða Kubuntu undanfarið og þetta er mun hreinlegri uppsetning heldur en á Fedora Core, bara ansi snyrtilegt hjá þeim. Eina sem vantar uppá uppsetninguna á Kubuntu hjá mér er að ég hef ekki getað komið hljóðinu í gegn - en það ætti að hafast fyrir rest, lenti í svipuðum vandræðum með það í Fedora á sínum tíma.

Það er gott að sofa - annar hluti

2006-06-12T00:28:00.000Z

Arg... bévítans tölvuskriflinu finnst ennþá gott að sofa. Kom semsagt aftur upp núna eftir að hún var búin að haga sér skikkanlega í þónokkurn tíma að hún sofnaði. Semsagt ekki minniskubburinn sem var að valda þessu. Dáp!!! Nú er ég alveg að verða gaga yfir þessu. Taldi mig vera búinn að finna lausnina (um kl. 3 síðustu nótt), nefnilega að CD/DVD drifið væri eitthvað að klikka, þ.e. ef það væri diskur í því þegar vélin er að ræsa sig þá ætti hún það til að sofna. Þessi tilgáta hélt þar til u.þ.b. 11 í morgunn þegar gripurinn fór aftur í djúpan svefn án þess að það væri diskur í drifinu. Ojæja... aftur á byrjunarreit - eða kannski ég lúffi bara fyrir tölvuguðinum og fari bara með tölvuna í viðgerð.

Kjánalegar setningar í blaðagreinum

2006-06-11T17:58:00.000Z

Geturðu fundið kjánalegar setningar í þessari grein? Hmmm... hvað skyldi það nú vera. Fréttin er semsagt um að faðir Camillu hertogaynjunnar af Cornwall eiginkonu Karls bretaprins lést í dag, og hvernig tók Camilla þessu? Jú, "Camilla var að sögn ákaflega leið" segir í fréttinni. Svo er textinn við myndina af Camillu heldur ekkert slor.... af henni brosandi og undir myndinni segir m.a. "Myndin er tekin við ánægjulegra tækifæri" - Jahérna...

Vertu hræddur, vertu mjög hræddur

2006-06-06T00:26:00.000Z

Þetta eru líklega orðin sem Steve Ballmer sagði við Bill Gates þegar hann sýndi honum þessa frétt. Semsagt Google er að koma með einhverskonar töflureikni sem verður gerður aðgengilegur á netinu (eins og allt sem frá Google kemur). Kannski þetta nái að slá Microsoft Excel aðeins út? En ja.... kannski ekki, ef svo væri þá væri þegar meiri dreifing á OpenOffice - pakki sem er sambærilegur og Microsoft Office, þ.e.a.s. ætti að duga fyrir venjulega heimanotkun (ég nota semsagt OpenOffice sjálfur á heimavélinni). Ætli Google taki ekki ritvinnslumarkaðinn fyrir næst ef þetta gengur vel - þeir eiga a.m.k. grunninn í það (eitthvað sem kallast "writely").

Það er gott að sofa

2006-06-05T17:52:00.000Z

Það hefur tölvunni minna a.m.k. fundist undanfarið. Yfirleitt strax í ræsingu en stundum í miðju kafi þá hefur tölvan tekið upp á því að fara að sofa, þ.e. það dettur allt út af skjánum en samt er ljósið ennþá á á tölvunni (en engin vinnsla samt á harða diskinum) - og skjárinn kemur með meldingu um að syfja sé að færast yfir... Þetta var að gerast hvort sem ég var að ræsa Windows XP eða Linux Fedora Core þannig þetta var ekki stýrikerfisvandamál heldur eitthvað með vélbúnaðinn. Prófaði að taka annan minniskubbinn úr og jibbí.... vélin hefur ekki "sofnað" síðan. En er reyndar þá bara með 512 MB í innra minni þannig hún er déskoti hæg. Vélin ku víst vera ennþá í ábyrgð en ég veit ekki hvort ég nenni að standa í því að reyna fá eitt stk. 512 MB kubb útá ábyrgðina, en ... svo á ég svosem eftir að tékka á hvort að það sé eitthvað að raufinni sjálfri sem kubburinn var í. Gæti semsagt verið móðurborðið sjálft sem er að klikka en ekki kubburinn - þarf að tékka á því...

Fedora Core 5 & Ubuntu

2006-05-09T17:21:00.000Z

Fyrir nokkru uppfærði ég Fedora Core úr útgáfu 4 í 5. Að mestu sársaukalaus aðgerð fyrir utan smá erfiðleika með X umhverfið - en það þurfti bara smá yfirlegu. Annars þá var ég líka að prófa Ubuntu, linux dreifinguna sem Google ku nota innanhúss. Náði semsagt í LiveCD eintak sem gerði mér kleyft að prófa Ubuntu á tölvunni minni án þess að eiga neitt við þá uppsetningu sem var þar fyrir (dual boot milli Windows XP og Fedora Core 5) - stýrikerfið og allt 'hele klabbið' er ræst upp af geisladisk, nokkuð svalt. Jamm... og Ubuntu gat sótt gögn af flakkaranum mínum sem er með NTFS skráarsniðinu (sem er sér Microsoft Windows skráarsnið) ólíkt Fedora sem þurfti sérstakan módúl til að það væri hægt. Kannski maður prófi að skipta þegar Ubuntu 6 útgáfan verður orðin endanleg.

Annars þá er hér gott dæmi um að Microsoft menn geta gert grín að sjálfum sér:
MS Ipod Parody - Google Video

Myndasögur eftir Alan Moore, Frank Miller, Mike Mignolia o.fl.

2006-05-01T22:32:00.000Z

Já, ég er orðinn þvílíkt húkkaður á myndasögur. Nei - ég er ekki að tala um Andrés Önd. Markhópurinn að þessum sögum sem ég hef verið að lesa er aðeins eldri. Byrjaði á að lesa V for Vendetta eftir Alan Moore þegar myndin kom út, og er búinn að lesa þónokkuð meira síðan. Hef semsagt verið að lesa bækur eftir Alan Moore (V for Vendetta, Watchmen (sem vann Hugo verðlaunin - ein æðstu
verðlaunin í SciFi), Promothea, The League of Extraordinary Gentlemen, The Swamp Thing, Top 10 & Smax, 3 Batman bækurnar eftir Frank Miller (þann sama og skrifaði Sin City bækurnar og leikstýrði síðan myndinni ásamt Rodriques) - í einni er sagt frá upphafi Batman og í hinum tveimur þá er sagt frá Batman þegar hann er orðinn miðaldra maður, kominn á "eftirlaun" en snýr aftur til að herja á óþjóðalýðnum í Gotham borginni - snilld, Hellboy eftir Mike Mignolia og núna síðast Fables eftir Bill Willingham. Snilldarbækur allt saman. Í sumum þessum bókum eru höfundarnir að taka fyrir gamlar þjóðsögur eða þekktar skáldsögur og endursegja, eða eins í snilldarsögunum Fables þá eru þjóðsögupersónurnar komnar í okkar heim (Mjallhvít er varaborgarstjóri yfir Fables samfélaginu og Stóri Grimmi úlfurinn (sá sem herjaði á Grísina þrjá) er lögreglustjórinn). Í bók nr. 2 af Fables er lagt útaf sögunni 'Animal Farm' eftir George Orwell - þar sem í vonda liðinu eru m.a. Grísirnir þrír, Glódís og birnirnir þrír, tígrísdýrið úr Jungle Book ofl., semsagt gargandi snilld. Annað dæmi er t.d. bók nr. 2 af The League of Extraordinary Gentlemen, þá er lagt útaf Innrásinni frá Mars eftir H.G. Wells ásamt því að Dr. Moreu úr The Island of Dr. Moreu kemur við sögu, síðan er einnig blandað inni söguna persónum úr SciFi bókum eftir höfund Tarzans sýnist mér (ég hef þó ekki lesið Burroughs bækurnar). Fyrsta League bókin var kvikmynduð fyrir ekki löngu með hræðilega lélegum árangri, en bókin sjálf er góð - enda ku Alan Moore vera orðinn frekar þreyttur á þeirri lélegu meðferð sem bækurnar hans fá á hvíta tjaldinu (þó mér finnist hann nú bara geta verið ánægður með V for Vendetta - teiknarinn af þeirri sögu var a.m.k. ánægður með herlegheitin). Nú er bara að bíða eftir því að "From Hell" eftir Alan Moore verði endurútgefin - hún hefur víst ekki verið fáanleg lengi, það var einnig gerð mynd eftir þeirri sögu fyrir nokkrum árum með Jonny Depp í aðalhlutverki en ég hef nú ekki gerst svo frægur að sjá þá mynd ennþá - aðdáendur myndasögunnar eru víst ekki ánægðir með gripinn. Vill oft vera þannig

Er ekki netið dásamlegt...

2006-04-30T22:49:00.000Z

Já - er ekki netið dásamlegt. Það gerir hinum örgustu hálvitum kleyft að láta í sér heyra. Dæmi um þá sem fylla þennan flokk má finna á vefsetri sem berst á móti hverskonar virkjunarframkvæmdum á Íslandi undir heitinu
Saving Iceland, jamm - í fljótu bragði sýnist mér þetta vera samansafn af hálvitum - og hér kemur svosem annað dæmi um hversu dásamlegt netið er, ég ætla semsagt að fella svona dóm yfir þessu pakki bara með því að rétt lesa yfir heimasíðuna þeirra (og þeir fella ábyggilega sama dóm um mig). En ég rakst reyndar á eina déskoti fyndna mynd á síðunni þeirra, hérna er bein vísun í myndina, alveg bráðfyndin - gæti svosem átt uppruna sinn hjá Baggalúti - og hefur líklega orðið til vegna vandræða Framsóknar nýverið við að fá fólk til bjóða sig framm á listanum vegna prófkjörs (minnir að það hafi verið í Rvk) fyrir væntanlegar sveitarstjórnarkosningar.

Að sulta....

2006-04-30T17:53:00.000Z

eða að "spamma". Jahérna, það er ekki nóg að maður fái allskonar sultupóst/spam heldur er einnig verið að sulta bloggið hjá manni með því að senda inn athugasemdir á það. Einhver bjáninn með bloggnafnið h3sff30pvfc sendi inn sultu á bloggið mitt um SketchUp, ótrúleg bjartsýni að halda að maður fari að eltast við þetta - en eitthvað hlýtur þetta að virka hjá þessum krimmum fyrst þeir eru að standa í þessu - eða eins og skáldið sagði (svo ég snari máltækinu yfir á okkar ástkæra og ylhýra): "það fæðist bjáni á hverri mínútu"

Það nýjasta frá Google - SketchUp

2006-04-28T19:46:00.000Z

Enn eitt apparatið frá Google, þrívíddarteikniforrit sem kallast SketchUp. Og eins og margt annað frá þessu svala (ennþá) fyrirtæki þá er þetta ókeypis til einkanota. Þú getur síðan geymt þitt efni hjá Google 3dwarehouse og deilt til annarra á Internetinu. Síðan ku víst einnig vera hægt að tengja teikningarnar við Google Earth. Þarf að skoða/nörda þetta nánar.

Puccini er málið

2006-04-21T23:58:00.000Z

Konan fór með öll börnin (hó... notaði fyrst "bæði börnin", augsýnilega ekki alveg vanur ennþá að eiga þrjú :) ) í dag í heimsókn til foreldra sinna og verður þar frammá sunnudag. Tómas Orri var orðinn ofurspenntur að komast í heimsókn til afa og ömmu í Hveragerði, spurði um það á fimm mínútna fresti hvort það væri ekki verið að fara að leggja af stað til afa og ömmu. Þannig að ég er búinn að vera einn heima, og hvað haldið þið að ég hafi eytt kvöldinu í? Lesa eitthvað eftir snillinginn Alan Moore? Horfa á einhverja snilldar scifi eða fantasy mynd í nýju græjunum með allt í botni? Spila Battlefield 2? Neibb... ekki aldeilis... fór í smá rölt niður laugarveginn í dag og kom við í Skífunni og keypti DVD útgáfuna af óperunni Turandot eftir Puccini, í stjórn Levine. Og er búinn að eyða lunganu af kvöldinu í að horfa/hlusta á verkið, það setur nýja vídd á óperuna að geta horft á sviðsetninguna og lesið textann um leið og maður hlustar - ég átti fyrir CD útgáfuna í stjórn Karajans. Videó gæðin sjálf eru léleg en hljóðgæðin eru góð, valmöguleiki á PCM, dolby digital 5.1 eða DTS - DTS rásin kemur best út. Já... magnað verk. Puccini er tvímælalaust eitt af uppáhöldunum tónskáldunum.

Hjördís Ylfa Arnarsdóttir

2006-04-01T23:31:00.000Z

Dóttirin var skírð í dag, og fékk nafnið Hjördís Ylfa. Góður dagur.

Á að leyfa áfengisauglýsingar?

2006-03-25T02:01:00.000Z

Ég segi já. Þá mundum við sjá meira af einhverju í líkingu við þetta. Ekki veitir af að hressa aðeins uppá auglýsingatímann í kassanum.

Svo legg ég ennfremur til að við bönnum belgískt barnaefni, ástæðuna má sjá hérna.

Og án þess að ég vilji vera neitt ofurvæminn þá er þetta gasalega sætt

Síðan er þetta hérna einhver vísbending um hvernig sum viðmót framtíðarinnar verða.

Nú... er þú hefur síðan gaman af Matrix myndunum þá er þetta kannski eitthvað fyrir þig (ekki fyrir viðkvæma).

Futurama

2006-03-19T20:16:00.000Z

Ja, ja.... sehr gut.... muchjó bene.... 26 nýir þættir af Futurama á leiðinni?. Bara að þetta reynist vera satt...

Hotmail & Windows Live Mail Beta

2006-03-16T01:19:00.000Z

Fyrir þónokkru fékk ég Gmail aðgang sem hafði leyfði manni að vera með um 2GB af tölvupósti vs. hotmail sem var með 2MB. Nú er Gmail komið upp í 2704MB. Einn fylgifiskur þess að vera með svona mikið geymslupláss undir tölvupóstinn (án þess að þurfa greiða kr. fyrir herlegeitin) er að maður er ekkert að stressa sig yfir því að henda út pósti, enda hef ég flutt mestalla póstlistaáskrift mína frá Hotmail yfir á Gmail þar sem Hotmail pósthólfið var alltaf að fyllast svo maður þurfti sífellt að vera tæma apparatið. Ég er núna kominn með yfir 1700 ólesna pósta í gmail pósthólfinu - hmmm.... kannski það sé ekki bara plús að vera með svona mikið geymslupláss... En semsagt svo ég snúi mér nú að því efni sem fyrirsögnin á þessu bloggi gefur fyrirheit um að þá var ég semsagt að fá prufuaðgang að Windows Live Mail Beta. Windows Live Mail Beta kemur í staðinn fyrir Hotmail aðganginn (sama póstfang og sama vefsetur, semsagt Live vörumerkjamarkaðssetning í gangi) og er með 2000MB geymsluplássi. Get þá líka farið að láta ólesna tölvupósta safnast upp á hotmail póstfanginu mínu.... jibbí.... errr.... aaa..... já kannski ég ætti að skrá mig af einhverjum af þessum blessuðu póstlistum sem ég les aldrei.... Hólímólí... klukkan orðin mikið og margt.... góða nótt.

Apple.is - framhald

2006-03-11T11:07:00.000Z

Þá eru þeir hjá Apple.is loksins búnir að uppfæra heimasíðuna sína (sjá fyrri póst), gerðu það síðasta fimmtudag (u.þ.b.) en voru nokkuð sniðugir og settu inn fréttir með eldri dagsetningum þannig að það virðist sem vefurinn hafi verið í stanslausri umsjá en ekki steindauður ja eiginlega frá því í september 2005 (fyrir utan myndbirtingu af nýja húsnæðinu), og verðlistinn er ennþá frá því í desember 2005. En skítt með það - gott hjá þeim að vera loksins búnir að uppfæra síðuna sína, og jamm og jæja - komnir með tilkynningu um að nýji Apple Mini sé kominn til landsins (þessi með Intel örgjörvanum). Græjan hjá þeim kostar ekki mikið - þ.e. sú með dual core örgjörvanum, um 80 þús. ísl. kr. Þetta eru sko græjur sem smellpassa við sjónvarpið eða skjávarpann heima í stofu. Apple væðing heimilisins er alltaf farin að líta betur og betur út - Apple mini fyrir sjónvarp/skjávarpa, iMac sem heimilistölva - eða eða Power Mac þegar sú vél kemur með Intel örgjörva í desember (?). En Dell tölvan mín er svosem góð og gild ennþá og engin ástæða til að skipta henni út strax en mikið væri "úber"svalt að smella einu stykki Apple Mini við skjávarpann og heimabíókerfið, svo ekki sé talað um notagildið :)

Apple.is - Er þetta til fyrirmyndar?

2006-02-06T20:37:00.000Z

Na... ég held nú ekki... Það virðist vera ágætis vöxtur hjá Apple á Íslandi, nýfluttir í nýtt og glæsilegt verslunarhúsnæði, eru að setja upp Apple verslanir á hinum Norðurlöndunum o.s.fr., en mér þykir frekar lélegt hjá þeim að vera með svona afspyrnu illa uppfærða heimasíðu. Myndin af nýja húsnæðinu er jú komin á forsíðu vefsins þeirra en "thats it folks!!!", verðlistinn er frá því í desember á síðasta ári og nýjasta fréttin á vefnum er frá því í september 2005. Ekki nógu góð frammistaða þarna. Og hvað er merkilegt búið að gerast undanfarið sem vantar upplýsingar um á heimasíðunni??? Jú - nú getur þú fengið Apple tölvur með dual core Intel örgjörva í stað PowerPC áður, þ.e. ferðatölvur og iMac með Intel örgjörvum. Og reyndar voru ferðatölvurnar frá Apple áður einungis fáanlegar með G4 örgjörvanum. En skítt með það... Það hefur lengi verið draumur hjá mér að fá mér Apple tölvu - og nú fer maður sko að láta verða af því. Líst helv. vel á þessar nýju vélar sem eru komnar með Intel örgjörvanum - ekki spurning að þetta er eitthvað fyrir nördagenið... Spurning hvort hægt sé að fá (utanáliggjandi) sjónvarpskort í iMac-inn? Líklega... Rakið dæmi.

"Operating Under the Influence"

2006-02-01T21:45:00.000Z

Já - sumir mundu halda því fram að maðurinn væri ennþá "Operating Under the Influence" miðað við ákvörðunartökuna undanfarið :)

Kaffibollinn og þvottavélin

2006-01-30T21:40:00.000Z

Nei - þetta er ekki heiti á skáldsögu sem ég er að vinna að... En það segir nokkuð um hvað maður hefur fyrir stafni hvar maður gleymir uppáhalds kaffibollanum sínum. Ég semsagt gleymdi honum ofaná þvottavélinni í dag - já þvottavélin fær sko að erfiða um þessar mundir, þökk sé nýjasta fjölskyldumeðliminum. Ég sem ætlaði að ná að lesa svo gasalega margar skáldsögur í þessu faðernisorlofi... :) hmm.... og er bara búin að klára eina, "The Centauri Device" eftir M. John Harrison (ein af þeim bókum sem hafa verið endurútgefnar í "Science Fiction Masterworks" ritröðinni)

Allt í sóma í arisóna

2006-01-29T14:44:00.000Z

Nú er bara að finna nafn á stelpuna. Yfirvaldið var það handvisst um að þetta væri strákur að við vorum bara búin að skoða strákanöfn (og finna góðan kandídat). Nokkrir hafa stungið upp á Davíðína Odda, stelpan á víst sama afmælisdag og Davíð Oddsson, en ég held að Davíðína verði nú ekki fyrir valinu :)

Annars þá gengur bara vel hjá okkur. Stelpan er vær og góð, drekkur bara og sefur. Og eldri systkinin bara nokkuð ánægð með nýju systurina (a.m.k. ennþá).

Stúlka Arnarsdóttir

2006-01-17T23:01:00.000Z

Já. Það var stelpa!!! Var tekin með keisara í morgunn, sem tekur ekki langan tíma... Við mættum semsagt á spítalann um korter yfir sjö í morgunn, Kristín var send upp í deyfingu um kl. 8, um kl. 8:30 fer ég upp á skurðstofu, og korterí síðan er dóttirin komin í heiminn (rétt rúmar 16 merkur og 51 cm) - síðan voru þau reyndar smá stunda að sauma saman aftur. En öllum heilsast vel. Glimmrandi hamingja :)

17. janúar 2006 er dagurinn...

2005-12-20T21:30:00.000Z

Já - það er búið að ákveða afmælisdag barnsins, hann verður 17. janúar. Semsagt Kristín fer í keisarann 17. janúar 2006 - nema móðir náttúra ákveði að flýta þessu eitthvað. Dálítið skrítið að vita dagsetninguna svona nákvæmlega... Arrr..... og það er örstutt í þetta.... hólímólí.....

Þetta er nú bara sprenghlægilegt...

2005-12-18T17:38:00.000Z

Myndin "Superman Returns" ku víst vera á leiðinni, í leikstjórn Bryan Singer. En það kom víst babb í bátinn... Súpermann ku víst vera "of stór" fyrir hvíta tjaldið.... ehemm.... ekki er nú öll vitleysan eins, og nei það er víst ekki 1. apríl í dag.

Bráðum koma blessð jólin og ....

2005-12-17T20:49:00.000Z

20. des. fer ég í síðasta prófið. Púff..... mikið verður gott þegar þessari törn verður lokið. Hmmm.... hef ekki einu sinni getað séð King Kong ennþá :( Og svo er Narnia á leiðinni, og "directors cut" af Sin City á DVD - jamm það verður nóg að gera um jólin :)

Arrr.... já - fyrir þá sem það ekki vita þá er ég í mastersnámi í tölvunarfræðum í HÍ. Og líkar vel. Mæli hikstalaust með því fyrir þá sem hafa verið nokkur ár á vinnumarkaðnum að smella sér í framhaldsnám, ágæt og fersk tenging aftur við fagið að fara í masterinn. Svolítið öðrvísi að læra núna fyrir próf heldur en áður - enda aðstæður aðeins öðrvísi núna heldur en '97. Minna stressaður (sem betur fer) en minni tími (því miður).

Nýtt mátskjal fyrir bloggið

2005-12-01T22:10:00.000Z

Þá er að prófa nýtt útlit á bloggið, ég ætlaði að virkja "comment" möguleikann aftur sem ég var einu sinni með hérna inni frá Haloscan en það gekk nú ekki alveg. Auk þess sem að þá höfðu gömlu "comment"-in öll dottið út. Í fyrstu leit þó út fyrir að þetta yrði lítið mál, þ.e. HaloScan taldi mér trú um að þeir gætu gert þetta bara nokkuð sjálfvirkt, þ.e. sett inn "comment" fítusinn á bloggið. Ég renndi í gegnum einhver skref í töfra/álf (wizard) hjá þeim og ekkert skeði, nema að mátskjalið sem ég var áður með skemmdist eitthvað, svo ég ætla bara prófa nýtt og virkja comment möguleikann sem er innbyggður í Blogger.com.

Firefox 1.5 kominn

2005-11-30T03:29:00.000Z

Þá er komin ný útgáfa af besta vefráparanum. Ja - kannski ekki besti vefráparinn til notkunar inni í fyrirtækjum en fyrir heimanotendur þá er málið firefox. Möguleikarnir sem kerfisstjórar/netstjórar fyrirtækja hafa til að stjórna hvernig IE hagar sér eru svosem takmarkaðir en eftir því sem ég best veit þá hefur Firefox enga slíka möguleika. Það að þessum blessuðu mönnum sem sjá um apparatið skuli yfirsjást svona atriði er óskiljanlegt, jafn óskiljanlegt og það að Microsoft skuli ekki bæta þessa virkni í IE.

Þessi útgáfa af Firefox sem var að koma er útgáfa 1.5. Af einhverjum ástæðum þá hoppa þeir úr útgáfu 1.0.7 yfir í 1.5. Því það er svo "stór" útgáfa. Blablabla.... dæmigert markaðssetningarþvaður. Menn eiga bara að hætta með þessi aula númerakerfi og miða við ártal.mánuður, og .release + hlaupandi númer, ef þarf. Þannig fengi þessi útgáfa númerið 2005.11, ef það kæmi önnur útgáfa (krítískt "bugfix") sama dag (frekar ólíklegt samt), þá gæti sú útgáfa annaðhvort fengið númerið 2005.11.R2, síðan 2005.11.R3 o.s.fr. Og síðan 2005.11.B1 ef um "beta" hugbúnað væri að ræða.

Þegar tölvan hefur vit fyrir manni...

2005-11-27T22:02:00.000Z

Já - tölvugreiið afrekaði það í dag að hafa vit fyrir mér. Eins og skipulögðum manni sæmir að þá ákvað ég að skammta mér pínkupons (já í alvöru) Battlefield 2 spil nýlega, svona í tilefni af því að það er svo mikið að gera... og jú - kemur upp þessi skemmtilega villa þegar ég reyni að taka þátt í netspili: "Invalid CD key" - glæsilegt. Hef einu sinni lent í þessu áður með þennan leik og þá endaði það með því að ég þurfti að henda leiknum út af tölvunni + registry hakk og setja hann aftur inn frá grunni. Þetta er eitthvað sem ég kem ekki til með að gera fyrr en eftir prófasyrpuna í HÍ, ja.... reyndar líklega ekki fyrr en á næsta ári - ég er ekki búinn í prófum fyrr en 20. des, og það telst kannski ekki vera beint í anda jólanna að spila BF2 :)

Nokia 9500 Communicator rokkar

2005-11-09T23:53:00.000Z

Er að prófa Nokia 9500 Communicator símann. Snilldargræja (enn sem komið er). Nokkuð stór sími enda kemur þetta algjörlega í staðinn fyrir lófatölvur. Þarna er maður semsagt kominn með lófatölvu og síma í einu og sama tækinu, með víðskjá (widescreen) og "alles". Síðan er hann einnig með stuðning við þráðlaus net þannig að maður þarf ekki að stóla á hægvirka GPRS tengingu fyrir gagnaflutninga. Massíft svalur. Sá einnig að Nokia er farið að selja "Internet töfluna" Nokia 770, þ.e. ekki sími heldur einskonar Linux útgáfu af Tablet PC. Það verður gaman að sjá hvernig þeim gengur með þetta - gæti komist á flug þegar þeir bæta við VOIP stuðningi á næsta ári. Og kostar ekki nema 245 pund. En kannski dálítið dýrt apparat ef þetta endar bara síðan sem stór "universal" fjarstýring - ja... ekki það... ég sá Philips fjarstýringu um daginn sem kostaði um 150 þús. íslenskar.

100 bestu bækur allra tíma skrifaðar á ensku...

2005-11-06T11:32:00.000Z

Duh.... næstum því! Rakst á þennan lista hjá Times yfir 100 bestu bækur sem hafa verið skrifaðar á ensku, sjá hérna. Mér telst til að ég sé búinn að lesa einungis 9 stk. af þessum lista (er byrjaður á þeirru tíundu, Snow Crash eftir Neal Stephenson). En bækurnar sem ég hef lesið á þessum lista eru: Animal Farm eftir George Orwell, The Catcher in the Rye eftir J.D. Salinger, Lord of the Flies eftir William Golding, The Lord of the Rings eftir J.R.R Tolkien, Neuromancer eftir William Gibson, 1984 eftir George Orwell (eða sá ég bara myndina?), The Spy Who Came in From the Cold eftir John le Carre, Beloved eftir Toni Morrison, The Sun Also Rises eftir Ernest Hemingway (afskaplega leiðinleg bók). Síðan er ég búinn að kaupa Miðnæturbörnin eftir Salman Rushdie en á eftir að lesa hana. Svona listar geta verið skemmtilegir og gaman að skoða hvað maður hefur sjálfur lesið af þeim bókum sem komast þarna inn. En maður þarf nú ekki endilega að vera sammála - t.d. finnst mér Njósnarinn sem kom úr kuldanum ekki vera besta bók John le Carre, Smiley bækurnar finnst mér vera toppurinn hjá honum. Þessi listi hjá The Time Magazine er síðan valinn af einhverjum tveimur einstaklingum og sagður vera topp 100 listi allra tíma yfir bækur á enskri tungu - smá mótsögn þar við undirtitil listans sem segir þetta vera lista yfir bækur frá 1923 til nútímans. Einhver mistök við prófarkarlestur í gangi þarna :)

Lærði nýtt orð í dag: Demagogue

2005-11-05T13:28:00.000Z

en verð búinn að gleyma því á morgunn :) Var sem sagt að lesa viðtal við Jimmy Carter fyrrverandi forseta Bandaríkjanna þar sem hann segir m.a. að Hugo Chavez forseta Venezuela sé "demagogue", mér finnst nú skilgreining H. L. Mencken á þessu hugtaki (sem er einnig tilgreind á Wikipedia síðunni sem ég vísa í) best, en hún er svona: "one who preaches doctrines he knows to be untrue to men he knows to be idiots". En hver er eiginlega íslenska þýðingin? Err... lýðsskrumari?